Túrkistanda máslıhat depýtaty Qytaı azamatyn zorlady degen aqparat tarady
TÚRKІSTAN. KAZINFORM — Túrkistan oblysy Báıdibek aýdandyq máslıhatynyń depýtaty Erǵalı Amanbaevqa qatysty oqıǵa boıynsha polıtsııa tekserý júrgizip jatyr.
Áleýmettik jelide taraǵan aqparatqa qaraǵanda, Báıdibek aýdandyq polıtsııa bólimine Almaty qalasynyń turǵynynan aryz túsken.
Onda Báıdibek aýdanyna Qytaıdan kelgen tanystarymen birge barǵan kezde 34 jastaǵy sheteldik áıel adamǵa qatysty erkinen tys jynystyq sıpattaǵy áreket jasalǵany aıtylǵan. Aryzda atalǵan oqıǵaǵa aýdandyq máslıhat depýtaty Erǵalı Amanbaevtyń qatysy bary kórsetilgen.
Oqıǵaǵa baılanysty Túrkistan oblysy polıtsııa departamenti resmı túsinikteme berdi.
— Atalǵan fakti boıynsha sotqa deıingi tergeý amaldary júrgizilip jatyr. Kúdikti retinde Shymkent qalasynyń turǵyny anyqtalyp, qamaýǵa alyndy, — dep habarlady vedomstvodan.
Polıtsııanyń málimetinshe, qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti tergeý áreketteri júrgizilip jatyr. Tergeý qorytyndysy boıynsha zańnamaǵa sáıkes protsessýaldyq sheshim qabyldanady. Ózge aqparat Qylmystyq-protsestik kodekstiń 201-babyna sáıkes jarııa etilmeıtini habarlandy.
Eske sala keteıik, Erǵalı Amanbaev 2025 jyly Shymkentte jol erejesin óreskel buzǵany úshin sot sheshimimen bir jylǵa júrgizýshi kýáliginen aıyrylǵan bolatyn.
