Túrkistanda marafonǵa baılanysty birneshe jol jabylady
TÚRKІSTAN. KAZINFORM — 25 qazanda Túrkistanda besinshi Turkistan Marathon jarysy ótedi. Osyǵan baılanysty jarys baǵyty boıyndaǵy birqatar jolda kólik qozǵalysyna ýaqytsha shekteý engiziledi.
Marafonǵa álemniń 20-dan astam elinen 3 myńǵa jýyq adam qatysady dep josparlanǵan.
Túrkistan ákimdiginiń málimetinshe, jarystyń sóresi men máresi Karavan Saray Turkistan kesheniniń avtoturaǵynda ornalasady. Marafon baǵyty Bekzat Sáttarhanov dańǵyly boıymen áýejaıǵa deıin jalǵasyp, keri qaıtady.
— 25 qazanda saǵat 07:00–den 14:00–ge deıin jarys ótetin jol ýchaskelerinde kólik qozǵalysy ishinara shekteledi. Qatysýshylar ótken saıyn joldar kezeń-kezeńimen ashylady. Atap aıtqanda, Tutqabaı kóshesiniń Bekzat Sáttarhanov dańǵylynan Álqoja Ata kóshesine deıingi bóligi 24 qazanda saǵat 09:00–den 25 qazan kúni saǵat 20:00–ge deıin jabyq bolady. Al Karavan Saray Turkistan kesheniniń aınalasyndaǵy Álqoja Ata jáne Batyrbekov kóshelerinde, sondaı-aq Bekzat Sáttarhanov dańǵylynda 25 qazan kúni saǵat 07:00–den 09:10–ǵa deıin kólik qozǵalysy tolyq shekteledi, — delingen vedomstvo habarlamasynda.
Sonymen qatar Bekzat Sáttarhanov dańǵylynyń Tutqabaı kóshesinen Esim han dańǵylyna deıingi bóligi saǵat 07:10–nan 14:00–ge deıin jabylady. Budan bólek, Esim han dańǵylynyń Bekzat Sáttarhanov dańǵylynan áýejaıǵa deıingi bóliginde saǵat 08:20–dan 13:00–ge deıin kólik qozǵalysy ishinara shekteledi. Bul rette Esim han dańǵylynyń soltústik jaǵy ashyq bolady.
Qala ákimdigi turǵyndar men qonaqtarǵa marafonnyń sóre ornyna jetý baǵytyn 2GIS qosymshasy arqyly aldyn ala josparlaýǵa bolatynyn eskertti.
Aıta keteıik, jarys baǵdarlamasyna 42,2 shaqyrymdyq marafon, 21,1 shaqyrymdyq jartylaı marafon, 10 shaqyrymdyq júgirý men skandınavııalyq júris, sondaı-aq 10-14 jastaǵy balalarǵa arnalǵan 3 shaqyrymdyq júgirý kiredi.
Buǵan deıin Almatyda Abylaı han dańǵyly men Momyshuly kóshesi ýaqytsha jabylatynyn habarlaǵan edik.
