Túrkistanda mal sharýashylyǵyn damytýǵa bólingen 271 mln teńge sýbsıdııa qoldy bolǵan
TÚRKІSTAN. KAZINFORM — 31 sharýa qojalyǵy boıynsha derekter bazasyna mal sharýashylyǵynda naqty joq mal týraly jalǵan málimetter engizilgeni anyqtaldy.
Oblys prokýratýrasy «Saýran aýdanynyń veterınarııa bólimi» MM veterınarııalyq stantsııasynyń qyzmetkerlerine qatysty mal sharýashylyǵyn damytýǵa bólingen asa iri kólemdegi memlekettik sýbsıdııalardy jymqyrý faktisi boıynsha sotqa deıingi tergep-tekserýdi aıaqtady.
Tergeý nátıjesinde Oranǵaı jáne Jańa Iqan aýyldyq okrýgteriniń veterınarlary men veterınarlyq beket meńgerýshisiniń «Aýyl sharýashylyǵy janýarlaryn birdeılendirý» derekter bazasyna 31 sharýa qojalyǵynda shyn máninde joq usaq jáne iri qara mal týraly jalǵan aqparat engizip, jalpy somasy 271 mıllıon teńge bolatyn sýbsıdııany zańsyz ıemdengeni belgili boldy.
Oblys prokýratýrasynyń sotqa deıingi tergep-tekserý basqarmasy № 41590 áskerı bólimniń 1 qyzmetkerin, 3 veterınardy jáne 1 meńgerýshini kúdikti retinde tanydy.
— Kúdiktiler keltirilgen 19 mıllıon teńge kólemindegi zalaldy ishinara ótep, olardyń jalpy quny 120 mıllıon teńge bolatyn múlkine tyıym salyndy. Qazirgi ýaqytta qylmystyq is boıynsha sot protsesi júrip jatyr. Qazaqstan Respýblıkasynyń Qylmystyq-protsestik kodeksiniń 201-babyna sáıkes, tergeý múddesine baılanysty ózge aqparat jarııalaýǵa jatpaıdy, — delingen Túrkistan oblysy prokýratýrasynyń habarlamasynda.
Aıta keteıik, buǵan deıin Túrkistan oblysynda alaıaqtyq jasaǵan turǵynnyń jymqyrǵan qarjyny qumar oıynǵa jumsaǵany týraly habarlandy.