Túrkistanda quny 48 mln teńge bolatyn 11 jer ýchaskesi memleketke qaıtaryldy
ASTANA. KAZINFORM – Túrkistan oblysynyń Jetisaı aýdanynda kadastrlyq quny 48 mln teńgeni quraıtyn 11 jer ýchaskesi memleket menshigine qaıtaryldy.
Bul týraly aýdan prokýratýrasy jer zańnamasynyń saqtalýyna júrgizilgen taldaý qorytyndysy boıynsha habarlady.
Prokýratýra málimetinshe, tekserý barysynda jalpy aýmaǵy 59 gektar bolatyn ıgerilmegen, ıesiz qalǵan jáne zańsyz tabystalǵan 11 jer ýchaskesi anyqtalǵan.
«Prokýratýranyń qadaǵalaý aktisi negizinde jerdiń paıdalanylýy men qorǵalýyna memlekettik baqylaýdy júzege asyratyn organ sotqa talap aryzdar engizdi. Sot aktileri negizinde kadastrlyq quny 48 mln teńge bolatyn, jalpy aýmaǵy 59 gektardy quraıtyn 11 jer ýchaskesi memleket menshigine qaıtaryldy», – dep habarlady prokýratýra.
Sot aktileri zańdy kúshine endi.
Zań buzýshylyqqa jol bergen laýazymdy tulǵalar tártiptik jaýapkershilikke tartyldy.
Prokýratýra memlekettik múddeni qorǵaý jáne zańsyz tabystalǵan múlikti memleketke qaıtarý jumystary turaqty baqylaýda ekenin atap ótti.
Aıta keteıik, Túrkistan oblysynda jyl basynan beri memleketke qansha jer qaıtarylǵanyn osy jerden oqı alasyz.
