Túrkistanda qýaty 500 MVt bolatyn jylý energo ortalyǵy salynady
TÚRKІSTAN. KAZINFORM — Túrkistanda qýaty 500 MVt jylý energo ortalyǵy salynady. Bul týraly Energetıka vıtse-mınıstri Álibek Jamaýov Túrkistan oblysynyń turǵyndarymen kezdesýde aıtty.
Energetıka vıtse-mınıstri Álibek Jamaýov Túrkistan oblysynyń turǵyndarymen kezdesti.
Jıynǵa Túrkistan oblysy ákiminiń birinshi orynbasary Zulpyhar Joldasov jáne energetıka salasyna qatysty jaýapty mamandar qatysyp, halyqty tolǵandyrǵan máselelerdi tyńdady.
Álibek Jamaýov mınıstrlik tarapynan sala boıynsha atqarylyp jatqan jumystardy baıandap, aldaǵy josparlarmen bólisti.
Otyn-energetıka keshenindegi qazirgi jaǵdaıdy jáne óńirdi gazdandyrý máselesi týraly málimdedi.
«Túrkistan oblysynyń jańartylatyn energııa kózderin damytý áleýeti joǵary. Búgingi tańda oblys jańartylatyn energııa kózderiniń qýaty boıynsha respýblıkada kósh basynda. Óńirde jalpy qýaty 278 MVt bolatyn 21 jańartylǵan energııa kózderi jumys isteıdi. Onyń ishinde qýaty 16 MVt bolatyn 8 kún elektr stantsııasy jáne qýaty 262 MVt bolatyn 13 kondensatsııalyq elektr stantsııasy bar. Al 2025 jylǵa deıin qýaty 48 MVt bolatyn 7 nysannyń qurylysy josparlanǵan. Onyń ishinde qýaty 8 MVt 4 kún elektr stantsııasy jáne qýaty 40 MVt bolatyn 3 kondensatsııalyq elektr stantsııasy iske qosylmaq. Barlyq baǵyt boıynsha ákimdikpen birlese jumys atqaryp jatyrmyz», — dedi Álibek Jamaýov.
Basqosýda jınalǵan kópshilik ózekti máselelerdi ortaǵa salyp, vıtse-mınıstrge usynystaryn jetkizdi.
Máselen, jekemenshik kompanııalardyń ókilderi suıytylǵan gaz, shekti baǵa, tsıfrlandyrý máselelerin qozǵady.
Álibek Jamaýov baǵany basqa óńirlermen teńestirý boıynsha Ulttyq bankpen birlese jumystar atqarylyp jatqandyǵyn jetkizdi.
Al, sozaqtyq turǵyndar aýdanda tabıǵı gaz joq ekenin alǵa tartsa, kentaýlyqtar jylý, elektr energııasynyń tarıfin tómendetý kerektigin sóz etti.
Energetıka vıtse-mınıstri Álibek Jamaýov pen oblys ákiminiń birinshi orynbasary Zulpyhar Joldasov kezdesýde kóterilgen barlyq máseleler hattamaǵa engizilip, zań aıasynda tıisti sharalar qabyldanatynyn aıtty.
Al, jýrnalıstertermen ótken brıfıngte Álibek Jamaýov Túrkistanda qýattylyǵy 500 MVt bolatyn jylý energo ortalyǵy salynatyndyǵyn jetkizdi.
Al, Kentaý qalasyna jańa jylý energo ortalyǵyn salý josparǵa enbegen.
Tek qoldanystaǵy qazandyqtar demeýshiler tarapynan jóndeýden ótip, jylý energo ortalyqty tabıǵı gazǵa qosý isi atqarylmaq.
Munan soń, vıtse-mınıstr turǵyndardy jeke máseleleri boıynsha qabyldady.
