Túrkistanda kópbalaly analarǵa berilgen úıdiń tóbesinen sý aǵyp jatyr
TÚRKІSTAN. KAZINFORM — Túrkistan qalasynda bir aı buryn paıdalanýǵa berilgen kópqabatty turǵyn úıdiń sapasyna turǵyndar shaǵymdandy. Olardyń aıtýynsha, baspana tapsyrylǵanyna kóp ýaqyt ótpeı-aq páterlerdiń tóbesinen sý aǵyp, qabyrǵalary jarylǵan.
Besqabatty turǵyn úı Jibek joly saıabaǵy mańyndaǵy 26-kóshede ornalasqan. Atalǵan úı bıyl Memlekettik rámizder kúni paıdalanýǵa berilgen. Páterler turǵyn úı kezeginde turǵan kópbalaly analar men áleýmettik osal sanattaǵy otbasylarǵa tabystalǵan.
Turǵyndardyń aıtýynsha, birneshe páterdiń tóbesinen sý ótip, sylaqtary túsip, tusqaǵazdary qabyrǵadan ajyraı bastaǵan. Edenge tóselgen lınoleým búlinip, ájethana men jýyný bólmelerinde de aqaýlar anyqtalǵan.
Kópbalaly ana Gúldana Mýsınovanyń aıtýynsha, ol úsh bólmeli páterdi alý úshin birneshe jyl kezekte turǵan. Alaıda jańa qonysqa kóshý qýanyshy uzaqqa sozylmaǵan.
— Páter kiltin alǵan kúni úıge kirip kórgenimizde aqaýlar boldy. Ony merdigerlerge birden aıttyq. Olar bir-eki apta ishinde jóndep beremiz degenimen, sodan beri eshqandaı jumys júrgizilgen joq. Ákimdikke birneshe ret aryzdandym, biraq naqty nátıje joq. Qazir páterge kóship kele almaı otyrmyz, — dedi ol.
Turǵyndardyń sózinshe, keıbiri páterlerinde túneýge qorqyp, týystarynyń úıin panalap júr.
— Qazir kúnniń ystyǵyna qaramastan, tóbeden sý áli de tamshylap tur. Onyń qaıdan shyǵyp jatqanyn eshkim naqty aıta almaı otyr. Terezeler sapasyz ornatylǵan, esik jaqtaýlarynda da kemshilik bar. Asúıdiń tóbesinen sý aǵady. Gaz qubyry mańynan da sý shyqqandyqtan, balalarymyzdyń qaýipsizdigine alańdaımyz, — deıdi turǵyndar.
Al Túrkistan qalalyq qurylys bólimi basshysynyń orynbasary Dáýren Máýlenov turǵyn úıge qatysty tekserý júrgizilgenin aıtty. Onyń aıtýynsha, merdiger mekemege eki ret resmı hat joldanyp, eskertý berilgen. Alaıda kemshilikter joıylmaǵan soń úshinshi ret sotqa talap aryz joldanǵan.
— Qazirgi tańda qajetti qurylys materıaldary alyndy, endi jóndeý jumystary bastalady. Aldymen páterlerdiń ishki bóligindegi aqaýlar, keıin shatyrdaǵy kemshilikter jóndeledi. Áli qonystanbaǵan turǵyndardyń páterleri de tolyq tekserilip, barlyq anyqtalǵan olqylyq qalpyna keltiriledi, — dedi ol.
Buǵan deıin Túrkistanda jóndeýden ótken kópqabatty úıdiń qabyrǵalary qaıta jarylyp jatqany týraly jazǵan edik.
