Túrkistanda Konstıtýtsııalyq reformany qoldaýǵa arnalǵan erekshe mýral ashyldy
TÚRKІSTAN. KAZINFORM — Túrkistan qalasynda Konstıtýtsııalyq reformany qoldaý maqsatynda aýqymdy ári mazmundy is-shara ótti. Qalanyń basty týrıstik ortalyqtarynyń biri — Kerýen saraı kesheni aýmaǵyndaǵy turǵyn úıdiń qasbetine kásipkerlerdiń jeke qarajaty esebinen arnaıy Konstıtýtsııalyq mýral salyndy.
Jańa mýral — elimizdegi saıası jańǵyrý úderisteriniń, ádiletti qoǵam qurý jolyndaǵy batyl qadamdardyń kórkem beınesi. Onda Konstıtýtsııalyq reformanyń máni, halyq erki men birliginiń mańyzy, zań ústemdigi men azamattyq jaýapkershilik ıdeıalary zamanaýı kórkemdik tásilder arqyly aıshyqtalǵan.
Bul bastama — azamattyq qoǵam men kásipkerlik qaýymdastyqtyń belsendi atsalysýymen júzege asqan ıgi is. Kásipkerlerdiń áleýmettik jaýapkershiligi men el bolashaǵyna degen janashyrlyǵynyń naqty kórinisi retinde bul joba qoǵam tarapynan joǵary baǵalandy.
Mýraldyń ashylýyna oraı jastar ókilderiniń qatysýymen arnaıy fleshmob uıymdastyryldy. Іs-shara barysynda qatysýshylar Konstıtýtsııalyq reformany qoldaıtyn urandar aıtyp, kók aspanǵa referendým taqyrybyndaǵy áýe sharlaryn ushyrdy. Bul sımvolıkalyq áreket — eldiń jarqyn bolashaǵyna degen senim men ortaq jaýapkershiliktiń belgisi boldy.
Shara aıasynda jastar reformanyń mańyzdylyǵy, onyń memleket damýyna yqpaly týraly pikirlerin bildirip, Konstıtýtsııa — el birliginiń, turaqtylyq pen ádilettiliktiń berik negizi ekenin atap ótti. Ashyq aspan astynda ótken bul patrıottyq aktsııa qatysýshylarǵa erekshe rýh syılap, kópshiliktiń esinde uzaq saqtalatyn taǵylymdy sátke aınaldy.
Jańa mýral týrıstik nysandarǵa tyń serpin berip, qalanyń kórkem kelbetin odan ári aıshyqtaı tústi. Búginde turǵyn úıdiń qasbetindegi Konstıtýtsııalyq mýral jastardyń súıikti foto-aımaǵyna aınalyp úlgerdi. Bul — óner arqyly qoǵamdyq qundylyqtardy nasıhattaýdyń tıimdi úlgisi.
Atalǵan joba — Konstıtýtsııalyq reformanyń máni men mańyzyn halyqqa keńinen túsindirýge baǵyttalǵan kreatıvti ári mazmundy bastamalardyń biri. Túrkistan qalasynda júzege asqan bul ıgi is — el bolashaǵyna beıjaı qaramaıtyn azamattardyń ortaq umtylysynyń aıqyn kórinisi.