Túrkistanda Qolónershiler qalashyǵy ashyldy
TÚRKІSTAN. KAZINFORM — Dúnıejúzilik týrızm kúni merekesi qarsańynda Túrkistan qalasynyń rýhanı-mádenı ortalyǵynda ornalasqan Qolónershiler qalashyǵynyń resmı ashylý saltanaty ótti.
Bıyl Túrkistan qalasy halyqaralyq World Craft Council uıymynyń sheshimimen «Qolónershiler qalasy» mártebesine ıe boldy. Túrkistanda «Túrkistan – qolónershiler qalasy» atty halyqaralyq festıval uıymdastyryldy. Halyqaralyq festıvalge Túrkııa, Ázerbaıjan, Qyrǵyzstan, Ózbekstan, Tájikstan, Qytaı jáne Reseı elderinen 100-ge jýyq qolónershi keldi.
World Craft Council halyqaralyq uıymynyń qurmetti elshisi Azız Mýrtazaev arnaıy kelip, World Craft Council halyqaralyq uıymynyń sheshimimen jáne Dúnıejúzilik qolóner keńesiniń kelisimimen qabyldanǵan sheshim boıynsha Túrkistanǵa «Qolónershiler qalasy» mártebesi kýáligin tabystady.
Biregeı nysannyń ashylý rásiminde Túrkistan oblysynyń ákimi Nuralhan Kósherov kópshilikti jańa nysannyń ashylýymen quttyqtady.
– Turkistan World Craft Fest halyqaralyq festıvaline arnaıy jınalǵan álem sheberleri erekshe ortalyqtyń jumysyna jańasha serpin beredi dep senemiz. Bıyl Túrkistanǵa «Halyqaralyq qolónershiler qalasy» mártebesi berildi. Uly Jibek jolynyń boıynda ornalasqan tarıhı shahar ejelden qolóner men saýda ortalyǵy bolǵan, – dedi ol.
