Túrkistanda kólikteriniń nómirin alyp tastap, kortej jasaǵan júrgizýshiler jazalandy

TÚRKІSTAN. KAZINFORM - Túrkistan oblysy Jedel basqarý ortalyǵynyń polıtseıleri túngi saǵat 03:00 shamasynda jol erejesin óreskel buzǵan 10-ǵa jýyq júrgizýshini anyqtady.

ІІM baspasóz qyzmetiniń málimetinshe, Túrkistan qalasynyń J.Maıkotov – Almaty kósheleriniń qıylysynda Lexus RH330, Huyndai Elentra, Daewoo Nexia, Lada, VAZ 2114 kólikterin tizgindegen 10-ǵa tarta júrgizýshi temir tulparlarynyń nómirin alyp tastap, kortej jasap júrgeni anyqtaldy.

Bul derek boıynsha birden jaqyn aýmaqta júrgen patrýldik polıtsııaǵa habar berildi. Oqıǵa ornyna jetken avtoekıpaj jol erejesin buzǵan kólikterdi toqtatýǵa belgi berdi. Alaıda olar polıtsııanyń zańdy talabyna baǵynǵysy kelmedi. Osy sátte taǵy bir ekıpaj kómekke baryp, jan-jaqty júrgizilgen sharalar nátıjesinde quqyq buzýshylarǵa tusaý qoıyldy.

Tekserý kezinde kólikterdiń jol erejesin saqtamaı, turǵyndardyń tún tynyshtyǵyn buzǵany belgili boldy. Beınejazba jasaý úshin quqyq buzýshylyqqa barǵan jas jigittermen profılaktıkalyq túsindirme jumystary júrgizildi.

Nátıjesinde quqyq buzǵan jas júrgizýshilerdiń avtokóligi aıypturaqqa jetkizildi. Atalǵan kólik ıelerine birneshe bappen, ıaǵnı memlekettik tirkeý belgileri joq jáne qarsy baǵytqa shyǵyp kólik basqarǵany boıynsha ákimshilik shara qoldanyldy.

Túrkistan oblysynda 358 jumyskerdiń eńbek quqyǵy qorǵalǵanyn jazǵan bolatynbyz.