Túrkistanda kólik qozǵalysyn basqarý júıesi ıntellektýaldy deńgeıge kóterilip keledi
TÚRKІSTAN. KAZINFORM - Túrkistan qalasynda engizilip jatqan ıntellektýaldy kólik júıesi – «Aqyldy qala» jobasynyń mańyzdy bóligi bolyp tabylady.
Túrkistan qalasynda kólik qozǵalysyn basqarý júıesin jańǵyrtý jumystary qarqyndy júrgizilip keledi. Bul bastama Prezıdent Qasym-Jomart Toqaevtyń joldaýynda aıtylǵan «qalalardaǵy ınfraqurylymdy damytý, turǵyndardyń ómir sapasyn arttyrý jáne qaýipsizdikti qamtamasyz etý» baǵyttaryna sáıkes júzege asyrylyp jatyr.
Túrkistan qalasy ákimdigi usynǵan aqparatqa súıensek, ıntellektýaldy kólik júıesin engizý arqyly qala kóshelerindegi qozǵalys birkelki, tıimdi jáne qaýipsiz bolady, al turǵyndar men júrgizýshilerdiń ýaqyty únemdeledi.
Júıeniń basty jańalyǵy – baǵdarsham sıgnaldarynyń ózgerisi týraly aldyn ala habarlandyrý fýnktsııasy. Bul júrgizýshilerge jasyl nemese qyzyl tús qashan janatynyn aldyn ala kórsetý arqyly jyldamdyqty soǵan sáıkes retteýge múmkindik beredi. Mundaı sheshim jol qozǵalysy erejelerin saqtaýǵa kómektesip qana qoımaı, qala kóshelerindegi qozǵalysty birkelki ári qaýipsiz etedi. Alynǵan málimetter negizinde kidirister men qajetsiz toqtaýlar azaıady, kólik aǵyny úzilissiz júredi.
Sonymen qatar, baǵdarshamdardyń aǵymdaǵy jáne tarıhı tsıklderine súıene otyryp marshrýttardy josparlaý qarastyrylǵan. Bul júrgizýshilerge keptelissiz, ońtaıly baǵyt tańdaýǵa múmkindik beredi. Nátıjesinde qala kóshelerindegi transport qozǵalysy tıimdi uıymdastyrylyp, turǵyndar ýaqyty únemdeledi.
Joba aıasynda ıntellektýaldy kólik júıeleri (ITS) jáne V2X (kólik pen ınfraqurylym arasyndaǵy baılanys) tehnologııalaryn kezeń-kezeńimen engizýge daıyndyq júrgizilýde. Bul tehnologııa kólikter men jol ınfraqurylymy arasynda naqty ýaqyttaǵy derektermen almasýǵa múmkindik berip, qalada «aqyldy kólik» júıesin qalyptastyrýǵa jol ashady.
Qazirgi tańda osy joba boıynsha ıAndeks JShS-pen kelissózder júrgizilýde. Túrkistan qalasynda ıntellektýaldy kólik júıesin engizý Prezıdenttiń joldaýynda aıtylǵan «qalalardaǵy ınfraqurylymdy damytyp, turǵyndardyń ómir sapasyn arttyrý» maqsattaryna sáıkes júzege asyrylýda.
Jobanyń tolyq iske asýy qaladaǵy kólik qozǵalysyn jańa deńgeıge kóterip, turǵyndarǵa yńǵaıly, qaýipsiz jáne tıimdi qala ortasyn qurýǵa múmkindik beredi.
Túrkistan qalasynda engizilip jatqan ıntellektýaldy kólik júıesi – «Aqyldy qala» jobasynyń mańyzdy bóligi bolyp tabylady. Bul júıe qala ınfraqurylymyn jańǵyrtyp, turǵyndarǵa yńǵaıly, qaýipsiz jáne tıimdi kólik qozǵalysyn qamtamasyz etedi. Nátıjesinde, Túrkistan qalasyndaǵy kólik júıesi jańa deńgeıge kóterilip, qala kósheleri tıimdi, tártipti jáne qaýipsiz bolyp, turǵyndardyń kúndelikti ómiri yńǵaıly ári jaıly bolmaq.
Aıta keteıik, budan buryn Túrkistanda elektrondy qyzmetke degen suranys artyp kele jatqanyn jazǵan bolatynbyz.