Túrkistanda qoqys alańdary saıabaqqa aınalyp jatyr
TÚRKІSTAN. KAZINFORM - Konstıtýtsııa kúnine oraı Bekzat turǵyn alabynda jańa saıabaq ashyldy. Bul qaladaǵy zańsyz polıgon bolyp kelgen aımaqtarda salynǵan besinshi demalys orny.
Jalpy aýmaǵy 3 gektardy quraıtyn saıabaqta turǵyndar men qala qonaqtarynyń tynyǵýyna qolaıly jaǵdaı jasalǵan. 24 myń sharty metr aýmaq kógaldandyrylyp, 3500 aǵash otyrǵyzylǵan.
Aýmaqta balalarǵa arnalǵan oıyn alańshasy men vorkaýt alańy bar. Merekelik keshterdi ótkizýge arnalǵan sahna da qarastyrylǵan. Kelýshiler úshin 1200 sharshy metrdi quraıtyn avtoturaq jumys isteıdi. Odan bólek, 20 oryndyq pen 20 qoqys jáshigi ornatylyp, aıaq jol taqtaıshalary tóselgen. Arnaıy transformator ornatylyp, saıabaq tolyq jaryqtandyrylyp, qorshalǵan.
«Jaýapty merdiger mekeme mundaǵy kógaldandyrý jumystaryn óz esebinen júrgizip otyr. Jalpy qala ákiminiń Bekzat turǵyn alaby turǵyndarymen kezdesýinde kóterilgen 50 máseleniń barlyǵy oryndaldy. Búgin jańadan ashylǵan saıabaq – sheshimin tapqan máselelerdiń biri. Sondaı-aq, qazirgi tańda turǵyndardyń ótinishine sáıkes Bekzat alleıasy jóndeýden ótýde jáne Jandosov kóshesiniń boıyna ásemdik qorshaýlar ornatylyp jatyr», - delingen Túrkistan qalasy ákimdigi taratqan aqparatta.
Saıabaqtyń ashylý saltanatyna qala ákimi Nurbol Turashbekov jáne zııaly qaýym ókilderi men qalalyq máslıhat depýtattary qatysyp, jergilikti turǵyndardy merekemen quttyqtady.
Sondaı-aq, birqatar azamattar «Túrkistan qalasyna sińirgen eńbegi úshin» tósbelgisimen jáne alǵys hattarmen marapattaldy.
