Túrkistanda qoǵamdyq oryndardy lastaǵandarǵa 210 mln teńgege jýyq aıyppul salyndy
TÚRKІSTAN. KAZINFORM — Bıyl jyl basynan beri Túrkistan qalasynda 106 931 quqyq buzýshylyq anyqtalǵan. Onyń ishinde qoǵamdyq tártipke qatysty 26 192, jol qozǵalysy erejelerine baılanysty 80 739 jaǵdaı tirkelgen.
Túrkistan qalasy polıtsııa basqarmasy qoǵamdyq qaýipsizdik bóliminiń bastyǵy A.Saparbekovtiń málimetinshe, shaharda jyl basynan beri quqyq buzýshylyqtar boıynsha jalpy 1 mlrd 412 mln 677 myń teńge aıyppul salynyp, onyń 87,7% óndirilgen. Al 2024 jyldyń osy kezeńindegi aıyppul somasy — 644 mln. 313 myń teńge bolsa, óndirilgeni — 63,7%.
Statıstıkalyq málimetterge súıensek, ótken jyldyń osy kezeńimen salystyrǵanda oblys ortalyǵynda qoǵamdyq oryndardaǵy tazalyq boıynsha quqyq buzýshylyqtyń kóbeıgeni baıqalady. Bul rette byltyr 10 396 quqyqbuzýshylyq tirkelse, bıylǵy kórsetkish — 14 150.
— Quqyqbuzýshylyqtar negizinen halyq kóp jınalatyn aýmaqtarda tirkeledi. Ortalyq saıabaqtar, jańa turǵyn úıler aýmaǵy, qurylys alańdary, sondaı-aq qala shetindegi aýlaaralyq kóshelerde turmystyq jáne qurylys qaldyqtaryn tastaý jıi kezdesedi. Belgilenbegen jerlerge qurylys qaldyqtaryn tógý derekteri ásirese jańa qurylystar qarqyndy júrip jatqan aımaqtarda anyqtalyp jatyr. Jyl basynan beri qalada qoǵamdyq oryndardy lastaǵan 6554 quqyq buzýshyǵa 209 mln 889 myń teńge jáne abattandyrý qaǵıdasyn buzǵan 3392 quqyq buzýshylyq boıynsha 10 mln 478 myń teńge aıyppul salynǵan. Al jol jabyndysyn búldirgen 4204 quqyq buzýshy anyqtalyp, olarǵa 17 mln 396 myń teńge aıyppul salyndy, — delingen Túrkistan qalasy polıtsııa basqarmasy usynǵan aqparatta.
Sondaı-aq aıyppuldardy óndirý boıynsha jeke sot oryndaýshylaryna 14 963 hattama joldanyp, jumys oryndary arqyly 71 qaýlyny oryndaý nazarǵa alynǵan. Aıypturaqqa 2965 avtokólik qoıylyp, óndirilmegen aıyppuldarmen jumys júrgizilip jatyr.
Budan buryn elimizde qansha beınebaqylaý kamerasy iske qosylǵanyn jazǵan edik.