Túrkistanda qoǵamdyq monshanyń sapasyz qurylysy týraly vıdeo tarady
TÚRKІSTAN. KAZINFORM – Áleýmettik jelide Túrkistan qalasynda salynyp jatqan qoǵamdyq monsha qurylysynyń sapasyna qatysty turǵyndardyń syny aıtylǵan beınejazba tarady.
Vıdeoda nysan irgetasynyń túıisken buryshyndaǵy qabyrǵa úgitilip, keıbir tireý bólikteriniń jarylyp, qısaıǵany kórinedi.
Túrkistan oblysy ákimdigi atalǵan jaǵdaıǵa qatysty túsinik berdi.
– Bul ótken jyldyń qyrkúıeginde túsirilgen vıdeo. Kórsetilgen qurylys nysany – qoǵamdyq monsha qurylysy boıynsha birneshe ret tekserý júrgizilip, anyqtalǵan kemshilikterge baılanysty tıisti eskertýler jasaldy. Olqylyqtardy qysqa merzim ishinde joıý jóninde naqty tapsyrmalar berilip, olardyń oryndalýy qatań baqylaýǵa alyndy. Qazirgi ýaqytta qurylys jumystarynyń sapasy men qaýipsizdigi turaqty baqylaýda. Túrkistan qalasynyń ákimdigi qala aýmaǵynda júzege asyrylyp jatqan barlyq qurylys nysandarynyń belgilengen talaptarǵa tolyq sáıkes ári sapaly oryndalýyna erekshe mán berip otyr, – delingen oblys ákiminiń baspasóz hatshysy Mıra Súleımenova usynǵan aqparatta.
Ákimdik ókiliniń málimetinshe, qoǵamdyq monshanyń qurylysy 2025 jyldyń aqpan aıynda bastalǵan. Nysan eki qabatty, jalpy aýmaǵy – 4231,4 sharshy metr. Jeke qarajat esebinen júzege asyp jatqan jobany 2027 jyldyń tamyz aıynda aıaqtaý josparlanyp otyr.
Budan buryn Túrkistan oblysyndaǵy 469 qurylys nysanynda zań buzý anyqtalyp, qurylys salýshylarǵa 325 mıllıon teńgege jýyq aıyppul salynǵanyn jazǵan edik. Sondaı-aq zańsyz salynǵan 40 nysandy májbúrlep buzdyrý jóninde sotqa talap-aryz joldanyp, onyń 5-eýine qatysty buzý týraly sot sheshimi shyqqan.