Túrkistanda Qyzyl kitapqa engen eki arqardy zańsyz aýlaǵandar ustaldy
TÚRKІSTAN. KAZINFORM — Túrkistan oblysyndaǵy Qarataý memlekettik tabıǵı qoryǵynda Qyzyl kitapqa engen arqarlardy zańsyz aýlaý deregi tirkeldi. Qoryq ınspektorlary eki turǵyndy ustaǵan.
Qarataý memlekettik tabıǵı qoryǵy — Qazaqstandaǵy erekshe qorǵalatyn tabıǵı aýmaqtardyń biri. Jalpy aýmaǵy 34 300 gektardy qamtıtyn qoryq 2004 jyly qurylǵan.
Qoryq málimetinshe, jyl basynan beri tabıǵat qorǵaý zańnamasynyń saqtalýyn qamtamasyz etý maqsatynda 103 reıd ótkizilgen. Nátıjesinde bir brakonerlik derek anyqtalyp, qylmystyq is qozǵalǵan.
Kezekti reıd barysynda memlekettik ınspektorlar qoryq aýmaǵynda zańsyz ań aýlaǵan Kentaý qalasy Baıyldyr aýylynyń eki turǵynyn ustaǵan.
Tekserý barysynda olardan 2 jylqy, Qarataý arqarynyń 2 basy, 2 terisi, 8 sıraǵy, sondaı-aq 3 bas ań eti zattaı aıǵaq retinde tárkilendi. Barlyq zattaı aıǵaq Kentaý qalalyq polıtsııa bólimine tapsyrylyp, keıin Qyzylorda oblysy boıynsha Sot saraptamalary ınstıtýtyna joldandy.
— Atalǵan derek boıynsha sotqa deıingi tergep-tekserý bastaldy. Aldyn ala esep boıynsha Qyzyl kitapqa engizilgen bir arqar úshin esepteletin zalal shamamen 19-20 mln teńge. Qoldanystaǵy esepteý tártibine sáıkes, bir bas arqarǵa 1500 aılyq eseptik kórsetkish (AEK) belgilengen. Al quqyq buzý qoryq aýmaǵynda jasalǵandyqtan, oǵan 3 koeffıtsıent qoldanylady, — dedi qoryqtyń tabıǵı keshender men obektilerdi kúzetý bóliminiń bastyǵy Úsen Japarov baspasóz máslıhatynda.
Aldyn ala esep boıynsha zalal kólemi eki arqar úshin 38 mln 925 myń teńge dep baǵalandy.
Sonymen qatar jyl basynan beri qoryq aýmaǵyna ruqsatsyz kirgeni úshin 9 quqyq buzý deregi anyqtaldy. Nátıjesinde 9 jeke tulǵaǵa jalpy 97 312,5 teńge kóleminde ákimshilik aıyppul salyndy.
Buǵan deıin Túrkistan oblysynda taýeshkiniń laǵyn taıaqpen uryp jatqan vıdeo taraǵanyn jazǵan edik.
