Túrkistanda keýrek ósimdigin zańsyz jınaýǵa qarsy kúres qalaı júrgiziledi
TÚRKІSTAN. KAZINFORM — Óńirde byltyr keýrek jınaýǵa kelgen 100-den astam sheteldik anyqtalǵan.
Túrkistan oblysynda keýrek dárilik ósimdigin zańsyz jınaýdyń aldyn alý maqsatynda jumysshy top qurylyp jatyr.
Oblystyq polıtsııa departamentiniń málimetinshe, atalǵan top quramyna polıtsııa qyzmetkerleri, tıisti memlekettik organdar ókilderi jáne eriktiler enedi. Olar keýrek ósimdigi ósetin maýsym aıynda reıdtik-profılaktıkalyq is-sharalar júrgizedi.
— Ótken jyly júrgizilgen tekseris barysynda Arys qalasy jáne Otyrar, Saryaǵash aýdandarynda 100-den astam sheteldik anyqtaldy. Olar «Sheteldiktiń nemese azamattyǵy joq adamnyń QR halyqtyń kóshi-qony salasyndaǵy zańnamasyn buzýy» baby boıynsha jaýapkershilikke tartylyp, el aýmaǵynan shyǵaryldy. Sonymen qatar olarǵa 5 jylǵa deıin elge kirýge tyıym salyndy, — delingen vedomstvo taratqan aqparatta.
Sondaı-aq sheteldik jumys kúshin zańsyz paıdalanǵan 5 qazaqstandyq azamatqa qatysty da ákimshilik sharalar qabyldanǵan.
Keýrek ósimdigi Qazaqstannyń Qyzyl kitabyna engizilmegen. Degenmen «Ósimdikter dúnıesi týraly» zańǵa sáıkes, óńir ákimdiginiń qaýlysymen bul ósimdikti jınaýǵa 8 jyl merzimge shekteý qoıylǵan. Qazirgi ýaqytta jumysshy top atalǵan qaýly negizinde óz qyzmetin júzege asyryp jatyr.
Budan buryn Túrkistan oblysynda dárilik ósimdik qazǵan sheteldikter ustalǵanyn jazǵan edik.
