Túrkistanda «Qazaqstannyń úzdik taýary — 2026» óńirlik kórme-konkýrsy ótip jatyr
TÚRKІSTAN. KAZINFORM — Túrkistanda otandyq óndiris pen kásipkerlikti damytýǵa arnalǵan «Qazaqstannyń úzdik taýary — 2026» óńirlik kórme-konkýrsynyń saltanatty ashylýy ótti. Sharaǵa Túrkistan oblysynyń 200-den astam taýar óndirýshisi qatysyp, óz ónimderin kópshilik nazaryna usyndy. Kórme erteń de jalǵasady.
Túrkistan qalasyndaǵy «Kongress holl» kesheninde uıymdastyrylǵan kórmede azyq-túlik, jeńil jáne toqyma ónerkásibi ónimderi, jıhaz, qurylys materıaldary, aýyl sharýashylyǵy taýarlary, qolóner buıymdary, sondaı-aq zamanaýı tehnologııalyq ónimder men óndiristik jabdyqtar qoıyldy.
Sharanyń basty ereksheligi — kórmeniń tek ónim tanystyrý alańymen shektelmeýi. Kásipkerlerge saýda jelilerimen, dıstrıbıýtorlarmen, qarjy jáne logıstıka uıymdarymen, ınvestorlarmen jáne sheteldik seriktestermen iskerlik baılanys ornatýǵa múmkindik beretin arnaıy alań jasaqtalǵan.
Kórme aıasynda «Halyqqa arnalǵan úzdik taýarlar», «Óndiristik baǵyttaǵy úzdik taýarlar» jáne «Úzdik azyq-túlik taýarlary» nomınatsııalary boıynsha jeńimpazdar anyqtalyp, marapattaldy.
Túrkistan oblysynyń ákimi Nuralhan Kósherov óńir ekonomıkasyndaǵy óndiris pen kásipkerliktiń mańyzyna toqtalyp, jergilikti taýar óndirýshilerdiń eńbegin atap ótti.
— Memleket basshysy «Qazaqstanda jasalǵan» tańbasy sapa men básekege qabilettiliktiń belgisine aınalýy tıis ekenin atap ótken bolatyn. Osy baǵytta óńirde shıkizatty tereń óńdeýge jáne jańa óndirister ashýǵa basymdyq berip otyrmyz. Qazir kókónis, sút ónimderin, balalar taǵamyn jáne basqa da taýarlardy óndirýge baǵyttalǵan 40 ınvestıtsııalyq usynys ázirlendi. Jergilikti taýar óndirýshilerdiń 400-den astam ónimin qamtıtyn katalog ta jasaldy, — dedi Nuralhan Kósherov.
Ákimniń aıtýynsha, búginde oblysta 200 myńǵa jýyq orta jáne iri kásipkerlik sýbektisi bar. Olar bıylǵy segiz aıda 1,2 trln teńgeniń ónimin óndirgen.
«Atameken» QR Ulttyq kásipkerler palatasynyń Tóralqa tóraǵasy Qanat Sharlapaev otandyq óndirýshilerdi qoldaý jáne olardyń ónimderin ótkizý múmkindikterin keńeıtý qajettigin jetkizdi.
— Kásipker úshin ónim óndirý — jumystyń bir bóligi ǵana. Eń mańyzdysy — sapaly taýardy naryqqa shyǵarý, turaqty satyp alýshy tabý jáne jańa ótkizý arnalaryna jol ashý. Búgingi kórme osy múmkindikterdi bir alańda toǵystyryp otyr. Túrkistan oblysynda óndiristik áleýet te, kásipkerlik belsendilik te joǵary. Endigi mindet — osy áleýetti naqty naryqtyq nátıjege aınaldyrý, jergilikti ónimniń saýda jelilerine jáne eksporttyq naryqtarǵa shyǵýyn keńeıtý, — dedi Qanat Sharlapaev.
Kórme ekspozıtsııasynda erekshe nazarǵa ilikken jobalardyń biri — kapsýlaly úıler. Joba oblys ákimdiginiń qoldaýymen shaǵyn óndiristik park aýmaǵynda júzege asyrylyp jatyr. Óndiriste qoldanylatyn materıaldardyń basym bóligi — otandyq ónim.
— Bolashaqta eki qabatty jáne basqa da jańa úlgidegi kapsýlaly úıler shyǵarýdy josparlap otyrmyz. Bir kapsýlanyń baǵasy 8-9 mln teńgeden bastalady. Óndiristiń jyldyq qýaty — 200 danaǵa deıin. Tapsyrys berýshiniń qajettiligine qaraı úılerdiń jobasyn beıimdeýge bolady, — dedi «BNK Group Ltd» JShS bas dırektory Nııazáli Beısenbaev.
Kórme ekspozıtsııasynda aýyl sharýashylyǵyna arnalǵan agrodrondar da tanystyryldy. Jaqynda «Avatar Agricultural Technology Development» seriktestigi osy baǵyttaǵy zaýytyn iske qosty. Kásiporyn jylyna 500 dana tehnıka óndirýge qaýqarly.
— Agrodrondar aýyl sharýashylyǵy daqyldaryn búrký jumystaryna arnalǵan. Bir apparat 70 lıtrge deıin jumys suıyqtyǵyn kóterip, 5 gektarǵa deıingi egis alqabyn óńdeýge múmkindik beredi. Aldaǵy ýaqytta ónim túrlerin keńeıtip, basqa da salalarǵa arnalǵan ushqyshsyz ushý apparattaryn shyǵarýdy josparlap otyrmyz, — dedi kompanııa ókili Nurjan Qaısar.
Kórme baǵdarlamasy aıasynda «MADE IN TURKISTAN: EXPORT FORUM 2026» eksporttyq forýmy da ótedi. Onda otandyq ónimdi eksportqa shyǵarý, qarjylandyrý, halyqaralyq standarttar men sertıfıkattaý, logıstıka, saýda jelileri men marketpleısterge shyǵý máseleleri talqylanady.
Forýmǵa memlekettik organdardyń, damý ınstıtýttarynyń, qarjy uıymdarynyń, saýda jelileriniń jáne bıznes-qoǵamdastyqtyń ókilderi qatysyp, kásipkerlerdiń eksporttyq múmkindikterin keńeıtý joldaryn qarastyrady.
Kórmeniń iskerlik baǵdarlamasyndaǵy mańyzdy baǵyttardyń biri — B2B kelissózder. Kásipkerler Qazaqstannyń saýda jelilerimen, gıpermarkettermen, kóterme saýda kompanııalarymen, dıstrıbıýtorlarmen, marketpleıstermen jáne ózge de áleýetti satyp alýshylarmen tikeleı kelissózder júrgizedi.
Sonymen qatar Ózbekstan, Qyrǵyzstan jáne Qytaıdan kelgen sheteldik seriktestermen iskerlik baılanys ornatýǵa múmkindik qarastyrylǵan. Eki kún ishinde jańa seriktestik baılanystar ornatý, ónimderdi saýda jelilerine engizý, dıstrıbıýtorlarmen kelisim jasaý jáne eksporttyq naryqtarǵa shyǵý baǵytynda kelissózder júrgiziledi.
Erteń kórme baǵdarlamasy «BusinessGO» tsıfrlyq platformasy boıynsha kásipkerlermen kezdesýmen jalǵasady. Kezdesýde kásipkerlik qyzmetti tsıfrlandyrý, onlaın-kassa, taýar esebi, fıskaldyq talaptardy saqtaý jáne bıznestiń kúndelikti jumysyn jeńildetetin tsıfrlyq quraldar tanystyrylady.
Sondaı-aq «ATAMEKEN FAIR» ekspozıtsııalarynyń jumysy jalǵasyp, shara qorytyndysy boıynsha yntymaqtastyq týraly memorandýmdar men birqatar kelisimderge qol qoıý josparlanǵan.
Buǵan deıin otandyq óndirýshilerdi qoldaý sharalary jáne kásipkerlerge kórsetiletin memlekettik qoldaý tetikteri týraly jazǵan edik.
