Túrkistanda qazaq kúresinen Qajymuqan atyndaǵy álem kýbogi bastaldy
TÚRKІSTAN. KAZINFORM - Búgin Túrkistan qalasyndaǵy Olympic Center sport kesheninde qazaq dalasynyń dańqty batyry, kúsh atasy Qajymuqan Muńaıtpasulynyń júldesine arnalǵan qazaq kúresinen eresekter arasyndaǵy álem kýbogi saltanatty túrde bastaldy.
Tól sportymyzdyń mártebesin arttyrýdy maqsat etken halyqaralyq dodanyń ashylý rásimine Túrkistan oblystyq máslıhat tóraǵasy Nuraly Ábishov, Qazaq Kuresi qaýymdastyǵynyń bas dırektory Damır Bekbosynov jáne Túrkistan oblysy ákiminiń orynbasary Ertaı Altaev qatysyp, sportshylarǵa sáttilik tilep, jyly lebizin bildirdi.
– Túrki áleminiń rýhanı astanasy – qasıetti Túrkistanǵa qosh keldińizder! Búgin qazaq kúresinen ult maqtanyshy, kúsh atasy Qajymuqan Muńaıtpasuly atyndaǵy álem kýbogi ótip jatyr. Qazaq kúresi – ulttyq sport túrleriniń ishinde aıryqsha rýh pen qaısarlyqty dáripteıtin tól ónerimiz. Búginde álemniń 40-tan asa elinde qazaq kúresiniń federatsııalary qurylyp, júıeli jumys atqarylyp jatyr. Sońǵy jyldary álem, Azııa, Afrıka jáne Eýropa chempıonattary turaqty ótkizilip, qazaq kúresi jańa deńgeıge kóterildi. Sondaı-aq elimizde joǵary dárejede uıymdastyrylyp kele jatqan «Turan barysy», «Qazaqstan barysy», «Eýrazııa barysy» jáne «Álem barysy» syndy týrnırler halyqtyń zor qyzyǵýshylyǵyna ıe. Kúni keshe qazaq kúresinen eresekter arasyndaǵy Azııa chempıonaty sátti aıaqtaldy. Búginde Túrkistan qalasy qazaq kúresiniń halyqaralyq ortalyǵyna aınalyp otyr, – dedi Ertaı Kenjebekuly.
30-31 qazan kúnderi ótetin dúbirli dodada 14 elden kelgen 100-ge jýyq balýan boz kilemge shyǵyp, 8 salmaq dárejesi boıynsha baq synaıdy. Er jigittiń eptiligi men qaıratyn, rýhy men tózimin synǵa salatyn bul jarys álemniń úzdik balýandaryn anyqtamaq.
Jyl ótken saıyn aýqymy keńeıip, uıymdastyrý deńgeıi artyp kele jatqan baıraqty báseke bıyl erekshe formatta ótip jatyr. Dodanyń joǵary deńgeıde ótýine elimizdiń ulttyq sport qaýymdastyǵy men Túrkistan oblysy ákimdigi birlese atsalysyp otyr.
Qazaq kúresiniń abyroıyn halyqaralyq arenada jańa beleske kóterýdi kózdeıtin bul álem kýbogi – sportshylar úshin úlken syn, al jankúıerler úshin naǵyz rýh merekesi bolmaq.
Esterińizge sala ketsek, keshe atalǵan sport kesheninde qazaq kúresinen Azııa birinshiligi aıaqtalǵan bolatyn. Saryqurlyq dodasynda Qazaqstan quramasy 10 altyn, 4 kúmis jáne 2 qola medalmen jalpy komandalyq esepte kósh bastady.
Sondaı-aq, qazaq kúresinen kelesi álem chempıonaty qaı elde ótetini belgili boldy.