Túrkistanda qazaq kúresinen Azııa chempıonaty bastaldy

ASTANA. KAZINFORM - Búgin Túrkistan tórindegi Olympic Center sport kesheninde eresekter arasynda tól sportymyz — qazaq kúresinen Azııa birinshiliginiń jalaýy jelbiredi.

Túrki dúnıesiniń rýhanı ordasyna aınalǵan qasıetti Túrkistan qalasynda bastaý alǵan saryqurlyq dodasyna Qyrǵyzstan, Tájikstan, Túrkimenstan, Úndistan, Japonııa, Iran, Mońǵolııa, Pákistan qatarly 15-ke jýyq memleketten 200-ge jýyq balýan qatysyp jatyr.

Bási bıik dodada erler men áıelder ózara 16 salmaq (8-i er, 8-i áıel) dárejesi boıynsha synǵa túsip jatyr.

Atalǵan birinshilikte el namysyn eń tańdaýly qazaq kúresiniń sheberleri qorǵap jatyr.

Atap aıtsaq, erler arasynda 55 keli salmaqta Arhat Baımurzın, 60 kelide Nurtilek Qarakesekov, 66 kelide Nurǵalı Tursynǵazıev, 74 kelide Tilek Toqtasynuly, 82 keli de Asyljan Kárim, 90 keli salmaqta Aıdar Beskempir, 100 kelide Erqanat Moldaǵulov jáne asa aýyr salmaqta (+100 kg) Qaısar Shamshıdınov synǵa túsip jatyr.

Al áıelder quramasynda 48 keli salmaqta Aıdana Hasenqyzy, 52 kelide Saǵat Baıǵaraeva, 56 kelide Aqnur Asylbekova, 60 kelide Nazerke Asanhan, 65 keli salmaqta Uldana Tańjaryqova, 70 kelide Aqbota Qydyráli, 77 kelide Arýjan Jandarbaı jáne +77 keli salmaq sanatynda Araılym Shegenova el namysyn qorǵap jatyr.

Osy oraıda qazaq kúresiniń Týrızm jáne sport mınıstrligi bekitken joǵary jetistikter sport túrleriniń tizimine engenin atap ótken jón. Jańartylǵan tizimge Olımpıada, Paralımpıada, Sýrdlımpıada, Azııa jáne Azııa para oıyndarynyń baǵdarlamasyna engen 65 sport túri, sondaı-aq ulttyq sport túrleri engizilgen.

Sóıtip, qazaq kúresi ulttyq maqtanyshymyz ári tarıhı muramyz retinde basym sport túrleriniń qatarynan oryn alyp, olımpıadalyq sport túrlerimen terezesi teńesti.

Esterińizge sala keteıik, osyǵan deıin Qazaq Kuresi Assotsıatsııasynyń bas dırektory Damır Bekbosynov shaǵyn suhbat berip, qazaq kúresin damytýdaǵy basty maqsaty týraly aıtqan bolatyn.