Túrkistanda qaıtarylǵan aktıvter esebinen mýzykalyq mektep ashyldy
TÚRKІSTAN. KAZINFORM — Búgin Ordabasy aýdanynda 300 oqýshyǵa arnalǵan mýzyka óneri mektebiniń saltanatty ashylýy ótti, dep habarlaıdy QR Bas prokýratýrasynyń baspasóz qyzmeti.
Mektep memleketke qaıtarylǵan aktıvter esebinen salyndy jáne Memleket basshysynyń tapsyrmasyn iske asyrý aıasynda júzege asyrylǵan alǵashqy áleýmettik jobalardyń biri sanalady.
Ashylýǵa Bas Prokýrordyń orynbasary Ǵabıt Sadyrbekov, Túrkistan oblysynyń prokýrory Murat Tleýberdıev, Túrkistan oblysy ákiminiń birinshi orynbasary Zulpyhar Joldasov, sondaı-aq jergilikti atqarýshy organdar men qoǵam ókilderi qatysty.
Zamanaýı talaptarǵa saı salynǵan jańa bilim berý mektebi balalarǵa sapaly mýzykalyq bilim alýǵa múmkindik beredi, daryndy balalardy halyqaralyq konkýrstarǵa daıarlaýǵa jaǵdaı jasaıdy, sondaı-aq óńirdiń mádenı áleýetin nyǵaıtady.
Mektepte dombyra, qobyz, fortepıano jáne basqa da mýzykalyq aspaptardy úıretýge arnalǵan zamanaýı, arnaıy jabdyqtalǵan kabınetter qarastyrylǵan.
— Biz kóktemde qurylysty bastap, ýaqyt kapsýlasyn saldyq, al búgin, nebári segiz aıdan keıin, qurylys jumystarynyń qanshalyqty jyldam jáne sapaly aıaqtalǵanyna kýá bolyp otyrmyz, — dep atap ótti Bas Prokýrordyń orynbasary Ǵabıt Sadyrbekov.
Qazir qaıtarylǵan aktıvter esebinen Úkimetpen elimizdiń túrli óńirlerinde 434 áleýmettik nysan iske asyrylyp jatyr, olardyń 30-y Túrkistan oblysynda ornalasqan.
Bul jobalar óńirdiń áleýmettik ınfraqurylymyn damytýǵa jáne halyqtyń ómir sapasyn jaqsartýǵa eleýli úles qosady.
Budan buryn Túrkistan oblysy ákimdigi jeti mınýttyq beınerolıkke 100 mln teńge tólemekshi bolǵanyn jazǵanbyz.