Túrkistanda qaryndasy týǵan aǵasyna baýyryn berip, ómir syılady
TÚRKІSTAN. KAZINFORM – Túrkistan oblystyq klınıkalyq aýrýhanasynda úshinshi ret baýyr transplantatsııasy sátti jasaldy.
Ota joǵary bilikti mamandardyń qatysýymen ótti. Oǵan hırýrg Bolatbek Baımahanov bastaǵan dárigerler toby jumyldyryldy. Oblystyq densaýlyq saqtaý basqarmasynyń málimetinshe, 41 jastaǵy naýqasqa MELD shkalasy boıynsha 16 ball kórsetkishimen baýyr tsırrozy dıagnozy qoıylǵan.
Sońǵy jarty jylda onyń jaǵdaıy kúrt nasharlap, portaldy gıpertenzııa, astsıt jáne ózge de aýyr asqynýlar tirkelgen. Júrgizilgen em nátıje bermeı, transplantatsııa naýqastyń ómirin saqtap qalýdyń jalǵyz tıimdi joly retinde tańdalǵan.
– Naýqastyń 20 jastaǵy týǵan qaryndasy óz erkimen donor bolýǵa kelisim berip, tolyq medıtsınalyq tekserýden ótti. Qarsy kórsetilimder anyqtalmady. Otany A.N.Syzǵanov atyndaǵy Ulttyq ǵylymı hırýrgııa ortalyǵy men oblystyq klınıkalyq aýrýhanasynyń mamandarynan quralǵan birlesken komanda jasady, – delingen vedomstvo taratqan aqparatta.
Qazirgi tańda naýqastyń jaǵdaıy turaqty. Otadan keıingi kezeń asqynýsyz ótip jatyr, transplantatsııalanǵan baýyrdyń qyzmeti birtindep qalpyna kele bastaǵan.
Budan buryn Túrkistanda naýqasty uzaq ýaqyt mazalap kelgen qýyqtaǵy 80 tas ota arqyly alynǵanyn jazǵan edik.
