Túrkistanda halyqtyń birligin beıneleıtin kıiz úı tigildi
Túrkistanda halyqtyń birligin beıneleıtin kıiz úı tigildi, dep habarlaıdy Kazinform.
Túrkistan qalasyndaǵy «Etnoaýyl» kesheninde Qazaqstan halqy Assambleıasynyń tarıhı-aǵartýshylyq «Bir el» jastar jobasy aıasynda kıiz úı tigý is-sharasy ótti.
Igi sharada «Qoǵamdyq kelisim» RMM dırektorynyń orynbasary Nurlan Shýbaev barlyq etnos ókilderiniń birtutastyq pen kelisimde bir ortany meken etýi el irgesiniń beriktigine yqpal etetinin jetkizdi.
Bul is-shara Qazaqstan halqynyń birligin, úılesimdi etnosaralyq qatynastardy, týǵan el, Otandy beıneleıtin qazaqtyń qasıetti sımvolyna qurmet kórsetý maqsatynda ótkizildi. Sondaı-aq ortaq shańyraq astynda eldiń birligin, Otan ıgiligi úshin qazaqstandyqtardyń birlesken eńbegin, ár adamnyń eldiń damýyna qosqan úlesi men atsalysýyn bildiredi.
Jıynda el jastary kıiz úıdiń ýyǵyn shanshyp, shańyraǵyn tiktep, bıikke kóterdi. Sondaı-aq izgi nıetterin bildirip, aqsaqaldardyń aq batasyn aldy. Saltyn saqtap, dástúrin dáriptegen etnos ókilderi qazaq jerin, ásirese qasıetti topyraqty qonys etkenderin qýanyshpen jetkizdi.
Aıta keteıik, Túrkistan qalasynda QR Mádenıet jáne aqparat mınıstrliginiń qoldaýymen Qazaqstan halqy Assambleıasynyń tarıhı-aǵartýshylyq baǵyttaǵy «Bir el» atty jastarǵa arnalǵan is-shara ótti. Jobaǵa elimizdiń barlyq óńirinen 100-ge jýyq jas kelgen.
