Túrkistanda halyqaralyq qolóner kórmesi ótedi
TÚRKІSTAN. KAZINFORM – Memleket basshysynyń týrıstik ınfraqurylymdy damytý, ulttyq mádenıetti qoldaý jáne ishki týrızmdi ilgeriletý jónindegi tapsyrmasyn oryndaý maqsatynda Túrkistan qalasynda «Túrkistan — qolónershiler qalasy» halyqaralyq qolóner kórmesi ótedi.
Іs-shara óńirdiń mádenı-rýhanı ortalyǵynda salynyp jatqan iri týrıstik klaster — jańa Qolóner ortalyǵynyń aýmaǵynda uıymdastyrylady.
Túrkistandy rýhanı, mádenı jáne týrıstik ortalyq retinde damytý — memlekettik saıasattyń mańyzdy baǵyttarynyń biri. «Túrkistan — jaı ǵana qala emes, ol — rýhanı muramyzdyń jańǵyrý sımvoly» dep Memleket basshysy atap ótkendeı, qala mádenıet, týrızm jáne ekonomıkanyń mańyzdy ózegine aınalyp otyr.
Kórme qarsańynda Týrızm jáne sport mınıstriniń orynbasary Erjan Erkinbaev Túrkistanǵa jumys saparymen baryp, óńirdegi týrıstik ınfraqurylymnyń negizgi nysandarynyń biri — Qolóner ortalyǵynyń qurylysymen tanysty. Jalpy aýdany 2,5 gektardy quraıtyn jobada 25 sáýlet nysany qarastyrylǵan. Atap aıtqanda, qolóner sheberhanalary, kórme pavılondary, qonaq úıler, saýda jáne qoǵamdyq aımaqtar boı kóterýde. Joba tolyǵymen jeke ınvestıtsııa esebinen júzege asyrylyp jatyr. Jalpy quny — 5,5 mıllıard teńge.
- Osyndaı nysandar ishki týrızmdi damytý men kreatıvti ekonomıkany qalyptastyrýda strategııalyq mańyzǵa ıe. „Túrkistan — qolónershiler qalasy“ kórmesi Qolóner ortalyǵy aýmaǵynda ótetin alǵashqy iri is-shara bolmaq. Kórmeniń maqsaty — elimizdiń týrıstik áleýetin arttyrý, shyǵarmashylyq ındýstrııany qoldaý, mádenı bolmysymyzdy nyǵaıtý. Kórme týrıstik salany damytý jónindegi ulttyq jospar men Qazaqstannyń tarıhı-mádenı murasyn saqtaý jáne damytý tujyrymdamasyn iske asyrýdaǵy mańyzdy qadam, — dedi mınıstrdiń orynbasary.
Oblystyq týrızm basqarmasynyń málimetinshe, kórmege Qazaqstan men shet memleketterden 140-tan astam sándik-qoldanbaly óner sheberi qatysady dep kútilýde. Kelýshiler biregeı buıymdardy tamashalap, satyp alýmen shektelmeı, sheberlermen júzdesip, dástúrli jáne zamanaýı qolóner tehnıkasymen tanysý múmkindigine ıe bolady. Sonymen qatar is-shara aıasynda áýe sharlary shoýy, AVTOFEST avtosherýi, ulttyq taǵamdar usynylatyn gastro-jármeńke, júldeler utysy, sahnalyq oıyndar jáne otandyq tanymal ártisterdiń qatysýymen kontserttik baǵdarlama uıymdastyrylady.
2025 jyly Túrkistanǵa erekshe mártebe berilip, qala damýynyń jańa kezeńi bastaldy. Túrkistan bıyldan bastap túrki áleminiń týrızm astanasy ǵana emes, resmı túrde «Qolónershiler qalasy» mártebesine ıe boldy. Bul — eldiń tarıhı-mádenı dástúrin saqtap kele jatqan qolóner sheberlerin qoldaýǵa arnalǵan mańyzdy bastama.
Aıta ketelik Túrkistan oblysynda 800-den astam túlek «Serpin» baǵdarlamasymen grantqa túsken edi.