Túrkistanda qazaq-koreı ýnıversıteti ashyldy
TÚRKІSTAN. KAZINFORM - Bıyl osy ýnıversıtette bilim alýǵa Túrkistan oblysynan bólek, Astana, Almaty, Shymkent qalalarynan, sondaı-aq Qyzylorda, Jambyl jáne Qaraǵandy oblystarynan 400-ge jýyq talapker qujat tapsyrǵan.
Memleket basshysy Qasym-Jomart Toqaev óziniń bıylǵy «Jasandy ıntellekt dáýirindegi Qazaqstan: tsıfrlyq transformatsııa arqyly ózekti mindetter jáne olardy sheshý» atty Joldaýynda elimizdiń basty maqsaty – tolyqqandy tsıfrlyq memleketke aınalý ekenin atap ótken bolatyn. Osy strategııalyq mindetti júzege asyrý jolynda Túrkistan qalasynda ІT mamandaryn daıarlaıtyn «Woosong University Kazakhstan» joǵarǵy oqý orny saltanatty túrde ashyldy. Saltanatty sharaǵa Qazaqstan Respýblıkasy Premer-Mınıstriniń orynbasary Ermek Kósherbaev, QR Ǵylym jáne joǵary bilim mınıstri Saıasat Nurbek, Túrkistan oblysynyń ákimi Nuralhan Kósherov, Koreıa Respýblıkasynyń Qazaqstandaǵy Elshisi Chjo Te Ik, «Woosong Education Foundation» bilim berý qorynyń qurmetti tóraǵasy jáne basqarma múshesi Kım Son Keng arnaıy qatysyp, kópshilikti ýnıversıtettiń ashylýymen quttyqtady.
Túrkistan oblysynyń ákimi Nuralhan Kósherov el damýynda mańyzdy ról atqaratyn ıgi istiń júzege asýyna atsalysqan barsha seriktesterge alǵys bildirdi.
– Memleket basshysy Qasym-Jomart Kemeluly Toqaev elimizde álemniń jetekshi joǵary oqý oryndarynyń fılıaldaryn ashý jóninde naqty tapsyrma bergen bolatyn. Nátıjesinde, 1,5 jyl buryn Túrkistan oblysy ákimdigi men Koreıa Respýblıkasynyń «Woosong» bilim berý qory arasynda jańa ýnıversıtet ashý boıynsha memorandýmǵa qol qoıyldy. Al, búgingi sát – jańa oqý ornynyń ashylýy ǵana emes, halyqaralyq seriktestikke negizdelgen sapaly bilim berýdiń betburys kezeńi. Memleket basshysynyń «Jasandy ıntellekt dáýirindegi Qazaqstan: tsıfrlyq transformatsııa arqyly ózekti mindetter jáne olardy sheshý» atty bıylǵy Joldaýynda atalǵandaı, elimiz tolyqqandy tsıfrlyq memleketke aınalýdy kózdep otyr. Túrkistanda ashylyp otyrǵan sheteldik ýnıversıtet dál osy Prezıdentimiz belgilegen strategııalyq baǵyttyń naqty iske asýynyń aıqyn dáleli. Erekshe mártebege ıe bolǵan qasıetti Túrkistandy bilim men ǵylymnyń ortalyǵyna aınaldyrý – memleketimizdiń basty maqsatynyń biri. Búgingi saltanatty is-shara – sol maqsattyń aıqyn dáleli. Stýdentterge ǵylymmen aınalysyp, jańa ıdeıalardy júzege asyrýǵa barlyq múmkindikter ashyldy. Barshańyzdy «Woosong University Kazakhstan» ýnıversıtetiniń resmı ashylý saltanatymen quttyqtaımyn! – degen Nuralhan Oralbaıuly oqý ordasynan bilikti mamandar shyǵatynyna senim bildirdi.
Qatysýshylar ýnıversıetti aralap, oqý bólmelerimen tanysty. Munda stýdentterge barlyq jaǵdaı jasalǵan.
Túrkistan oblysy ákimdigi árdaıym jastardy qoldaýǵa, sapaly bilim men ǵylymǵa basa nazar aýdaryp keledi. Osy maqsatta oblys ákimdigi tarapynan ýnıversıtetke 100 grant bólinip, olardyń basym bóligi óńir jastaryna berildi. Bul bilim ordasynyń 2000 stýdentke deıin qabyldaýǵa múmkindigi bar. Bıyl osy ýnıversıtette bilim alýǵa Túrkistan oblysynan bólek Astana, Almaty, Shymkent qalalarynan, sondaı-aq Qyzylorda, Jambyl jáne Qaraǵandy oblystarynan 400-ge jýyq talapker qujat tapsyrǵan.
Túrkistanda boı kótergen bul ýnıversıtet aımaqtyń bilim berý áleýetin arttyrýmen qatar, óńirdiń tsıfrlyq transformatsııasyna serpin beredi. Bolashaq ІT mamandary men jas ǵalymdardyń tyń ıdeıalary qaladaǵy «aqyldy qala» jobalaryn damytýǵa, ınnovatsııalyq ınfraqurylymdy nyǵaıtýǵa tikeleı úles qospaq.
Túrkistandy zamanaýı tehnologııa men bilimniń toǵysqan ortalyǵyna aınaldyrý – búginde naqty qadamdarmen júzege asyp kele jatqan basty maqsattardyń biri.
Túrkistandaǵy bilim salasyn tsıfrlandyrý jańa deńgeıge kóterilip kele jatqanyn jazǵan bolatynbyz.