Túrkistanda feldsherlerdiń máselesin kótergen turǵynnyń psıhıatrııalyq esepke zańsyz alynǵany ras pa
TÚRKІSTAN. KAZINFORM — Áleýmettik jelide jáne birqatar BAQ-ta Túrkistan qalasynyń turǵyny Ómirbek Mýhammadty psıhıatrııalyq medıtsınalyq mekemege erkinen tys jetkizý jáne zańsyz ustaýǵa qatysty aqparat tarady.
Ómirbek Mýhammadtyń aıtýynsha, buǵan deıin ol Astana qalasynda, Pavlodar oblysynda jáne Otyrar aýdanynda feldsher bolyp jumys istegen.
2025 jylǵy qarashada ol feldsherlerdiń áleýmettik jáne eńbek máselelerin kóterý maqsatynda tıisti memlekettik organdarǵa eGov portaly arqyly birneshe resmı ótinish joldaǵan. Sonymen qatar elimizdiń ár óńirindegi medıtsına qyzmetkerleriniń pikir almasýyna arnalǵan WhatsApp tobyn qurǵan.
Ótken jyldyń 5 jeltoqsanynda eki polıtsııa qyzmetkeri ony «túsinikteme beresiz» degen ýájben turǵylyqty mekenjaıynan Túrkistan qalalyq polıtsııa basqarmasyna alyp ketken.
— Men polıtsııa basqarmasynyń ǵımaratynda úsh saǵat boıy tergeýde boldym. Tergeý barysynda eki jedel ýákil «úkimetke qarsy shyǵyp júrsiń», «halyqqa úgit-nasıhat júrgizip otyrsyń» degen mazmundaǵy sózder aıtty. Sol sátte ózimdi álsiz sezinip, mazam bolmaı turǵanyn jetkizdim. Tez arada jedel járdem shaqyryldy, — dedi ol.
Polıtsııa qyzmetkerleri men jedel járdem brıgadasy ony «medıtsınalyq tekserilýge aparamyz» degen ýájben Shymkent qalasyndaǵy psıhıatrııalyq medıtsınalyq uıymǵa jetkizgen.
— Maǵan ol jerde mekemeniń bólim meńgerýshisi, kezekshi dáriger jáne bas dárigerdiń eki orynbasary tarapynan psıhologııalyq qysym kórsetildi. Óz erkimmen 10-15 kún jatsam, jeńil dıagnoz qoıyp, psıhıatrııalyq dıspanserlik esepke almaı shyǵaratynyn aıtty. Al kelispesem, sot arqyly eriksiz qaıta ákelinip, dıagnozdy shızofrenııa dep qoıyp, dári-dármekti kúshpen salyp, psıhıatrııalyq dıspanserlik esepke alatynyn jetkizdi, — dedi ol.
Osy qysym saldarynan ol «óz erkimmen emdelýge kelisemin» degen jazbasha kelisim berýge májbúr bolǵan. Nátıjesinde 37 kún boıy statsıonarda jatyp, psıhıatrııalyq dıspanserlik esepke alynǵan.
Atalǵan jaǵdaıǵa qatysty Túrkistan oblysy densaýlyq saqtaý basqarmasy Kazinform tilshisine resmı túsinik berdi.
— Atalǵan azamat medıtsınalyq uıymda óziniń jazbasha ótinishi boıynsha em qabyldaǵan. Sondaı-aq jaqyn týysynyń jazbasha kelisimi alynǵan. Bul faktiler sáıkes qujattarmen rastalǵan. Medıtsınalyq kómek QR «Halyq densaýlyǵy jáne densaýlyq saqtaý júıesi týraly» kodeksiniń talaptaryna sáıkes kórsetilgen, — delingen basqarma málimetinde.
Vedomstvo habarlaýynsha, emdelýshige dıagnoz dárigerlik-konsýltatıvtik komıssııanyń qorytyndysy negizinde qoıylǵan.
— Emdelýshi statsıonarlyq emdi belgilengen tártippen alǵan. Barlyq emdik jáne dıagnostıkalyq is-sharalar bekitilgen klınıkalyq hattamalar men qoldanystaǵy normatıvtik-quqyqtyq aktilerge sáıkes júrgizildi. Medıtsınalyq qujattar durys rásimdelgen jáne belgilengen tártippen saqtaýly. Qajet bolǵan jaǵdaıda olar ýákiletti memlekettik organdarǵa zań sheńberinde usynylady, — dep málimdedi oblystyq densaýlyq saqtaý basqarmasy.
Ómirbek Mýhammad medıtsınalyq uıymǵa jatqyzý týraly aryzdy anasy óz erkimen jazbaǵanyn, oǵan belgili bir laýazymdy tulǵalar qysym kórsetkenin aıtady.
Aıta ketsek, ol 2024 jyly anasynyń aryzy boıynsha sotqa tartylǵan. Alaıda sot qorytyndysy boıynsha qorlaý belgileri anyqtalmaǵan jáne sot ony tolyq aqtaǵan. Sodan beri olar bir-birimen habarlaspaǵan, sol ýaqyttan beri bólek turady. Anasy Otyrar aýdanynda, al ózi ákesimen birge Túrkistan qalasynda turyp jatyr.
Ómirbek Mýhammad ózin psıhıatrııalyq dıspanserlik esepke qoıýdy zańsyz jáne negizsiz dep esepteıdi.
— Osy jaǵdaıdan keıin birneshe jerge jumysqa ornalasýǵa bardym. Alaıda psıhıatrııalyq dıspanserlik esepte turǵanymdy alǵa tartyp, eshbir mekeme jumysqa qabyldamaı otyr. Maǵan qoıylǵan dıagnozdy zańsyz dep sanaımyn. Ony joıýdy jáne psıhıatrııalyq dıspanserlik esepten shyǵarýdy suraımyn. Sonymen qatar táýelsiz psıhıatrııalyq saraptama taǵaıyndaýdy ótinemin. Polıtsııa, jedel járdem jáne psıhıatrııalyq mekeme qyzmetkerleriniń áreketteri tekserilip, kinálilerge zańǵa sáıkes shara qoldanylsa deımin, — dedi ol.
Budan buryn Túrkistanda áıelin psıhıatrııalyq ortalyqqa májbúrlep jatqyzǵan er adam sottalǵanyn jazǵan edik.
