Túrkistanda eskek esýden jazǵy Qazaqstan chempıonaty bastaldy

Sportty damytý dırektsııasy málimetinshe, bul kúzde Japonııada ótetin jazǵy Azııa oıyndaryna qorytyndy irikteý jarys sanalady.

Saltanatty ashylý rásimine QR Týrızm jáne sport mınıstrligi Sport jáne dene shynyqtyrý isteri komıteti tóraǵasynyń orynbasary Amanbaı Nurmuhanbetov, Túrkistan oblysy dene shynyqtyrý jáne sport basqarmasynyń basshysy Ǵalymjan Hýdıarov qatysyp, sóz sóıledi.

Osy jarysqa 11 óńirden 130-ǵa jýyq eskek esý sheberi qatysyp jatyr. Búgin jarystyń alǵashqy kúni 1000 metrge jarystar ótti.

- Nagoıa qalasy qabyldaıtyn sary qurlyq oıyndarynda baıdarka men kanoede eskek esýden 12 júlde jıyntyǵy sarapqa salynady. Alaıda ár komanda tek 10 dıstsıplınada ǵana sportshy qosa alady. Sonymen qatar Japonııada tek 1000 metrge jarys ótpeıdi. Tek qysqa qashyqtyqtarda júlde sarapqa salynady. Sol sebepti chempıonattyń aldaǵy kúnderi óte tartysty óteıin dep tur, - dep atap ótti Ulttyq quramanyń bas bapkeri Qaısar Nurmaǵambetov.

Túrkistandaǵy jazǵy Qazaqstan chempıonaty 21 maýsymda máresine jetedi.

Aıta keteıik, trıatlonnan Qazaqstan quramasynyń Azııa kýbogynyń kezeńine qatysatyn quramy jarııalandy.