Túrkistanda eriktiler 3 myńnan astam tasbaqany qaýipsiz jerge kóshirdi
TÚRKІSTAN. KAZINFORM — Otyrar aýdanynda kóktemgi dala jumystaryna daıyndyq barysynda maqta alqaptarynda kezdesken tasbaqalardy qorǵaý úshin arnaıy kóshirý jumystary uıymdastyryldy.
Bul bastamaǵa «Tasbaqa» tabıǵatty qorǵaý qory uıytqy boldy. Qor dırektory ıÝlııa Tsaýgg bastaǵan qyzmetkerler, sondaı-aq eriktiler men ınvestorlar qoldaý kórsetip, jalpy 50-ge jýyq adam men 7 tehnıka jumyldyryldy.
Syrdarııa-Túrkistan memlekettik óńirlik tabıǵı parkiniń aǵa ǵylymı qyzmetkeri Ǵanı Nazarbektiń aıtýynsha, tabıǵat janashyrlarynyń kómegimen 20-25 naýryz aralyǵynda 3 myńnan astam tasbaqa qaýipsiz jerge kóshirilgen.
— Jańadan ıgerilip jatqan aýmaqtar baýyrymen jorǵalaýshylar úshin qaýipti bolýy múmkin. Qazirgi ýaqytta eriktiler eki ýchaskede jumys júrgizip jatyr, al aldaǵy ýaqytta taǵy birneshe ýchaskede jalǵasady. Bul jumystar mamyr aıynyń sońyna deıin, aýa raıyna baılanysty maýsym aıynyń ortasyna deıin jalǵasýy yqtımal. Kún qatty ysyǵanda tasbaqalar kelesi kóktemge deıin uıqyǵa ketedi. Sondyqtan tabıǵatty qorǵaý jáne qorshaǵan ortany saqtaý baǵytyndaǵy jumystar turaqty túrde júrgiziledi, — dedi ol.
Spıkerdiń aıtýynsha, bul bastamaǵa oblys, aýdan ákimdikteri atsalysyp, jumysshylarmen jáne tehnıkalarmen qamtamasyz etpek.
Sonymen qatar, Orman sharýashylyǵy jáne janýarlar dúnıesi komıteti de ǵylymı jumystarǵa qoldaý bildirip otyr.
Budan buryn Atyraý oblysynda dala mysyǵy tabıǵı ortaǵa jiberilgenin jazǵan edik.
