Túrkistanda erekshe qajettiligi bar azamattar Quryltaı saılaýynda qalaı daýys beredi
TÚRKІSTAN. KAZINFORM — Quryltaı saılaýyna daıyndyq aıasynda óńirdegi 952 saılaý ýchaskesi qajetti materıaldyq-tehnıkalyq quraldarmen jabdyqtalyp, erekshe qajettiligi bar azamattar úshin qoljetimdi etildi.
Saılaý zańnamasyna sáıkes, densaýlyǵyna nemese ózge de dáleldi sebepterge baılanysty saılaý ýchaskesine kele almaıtyn azamattar úıde daýys bere alady. Ol úshin saılaýshy daýys berý kúnine deıin ózi tirkelgen ýchaskelik saılaý komıssııasyna ótinish berýi qajet. Osydan keıin komıssııa músheleri arnaıy tasymaldanatyn saılaý jáshigimen azamattyń turǵylyqty jerine baryp, daýys berý rásimin uıymdastyrady.
Túrkistan oblystyq aýmaqtyq saılaý komıssııasynyń málimetinshe, óńirde erekshe qajettiligi bar 14 873 saılaýshy tirkelgen. Onyń ishinde 3 365 azamat kreslo-arba qoldanady, 7 643 azamattyń kórý, al 3 865 azamattyń estý qabileti boıynsha múgedektigi bar.
— Saılaý kúni atalǵan azamattarǵa qolaıly jaǵdaı jasaý úshin óńirde 65 ınvataksı jáne 49 áleýmettik taksı qyzmet kórsetedi. Barlyq 952 saılaý ýchaskesi erekshe qajettiligi bar azamattardyń qoljetimdiligi eskerilgen nysandar men qyzmetterdiń kartasyna engizilgen. Sondaı-aq tirek-qımyl apparaty buzylǵan azamattarǵa arnalǵan arnaıy kabınalar men jeke buryshtardy uıymdastyrý jumystary aıaqtalǵan, — dep habarlady oblystyq aýmaqtyq saılaý komıssııasy.
Densaýlyǵyna nemese dáleldi sebepterge baılanysty saılaý ýchaskesine kele almaıtyn azamattar zańda belgilengen tártippen ýchaskeden tys daýys berý quqyǵyn paıdalana alady.
Buǵan deıin Quryltaı saılaýy aldynda jalǵan akkaýnttar men feık aqparat kóbeıgeni týraly habarlaǵan edik.
