Túrkistanda elektrondy qyzmetke degen suranys artyp keledi

TÚRKІSTAN. KAZINFORM - Jyl basynan beri «E-Otinish» júıesi arqyly oblys ortalyǵynda 3000 jýyq ótinim qabyldanǵan.

Memleket basshysy Qasym-Jomart Toqaev óz Joldaýlarynda tsıfrlyq tehnologııalardyń el ómirindegi rólin erekshe atap ótken bolatyn. Prezıdent: «Tsıfrlandyrý – jaı sándi úrdis emes, bul – memleket pen qoǵamdy jańǵyrtýdyń basty tetigi. Árbir azamat memlekettik qyzmetti jyldam, ashyq jáne ádil alýy tıis», – degen edi. Bul tapsyrma búginde búkil óńirlerde, sonyń ishinde Túrkistan qalasynda da júıeli júzege asyrylyp keledi.

Búgingi tańda Túrkistan qalasynda turǵyndarǵa memlekettik qyzmetterdi qoljetimdi, ashyq ári sapaly usyný baǵytynda aýqymdy jumystar atqarylýda. Ásirese, tsıfrlyq sheshimderdi engizý qarqyny artyp, halyqtyń ýaqyty men qarajatyn únemdeýge, artyq qujat aınalymyn azaıtýǵa jáne sybaılas jemqorlyq táýekelderin tómendetýge jol ashýda.

Jyl basynan beri «E-Otinish» júıesi arqyly oblys ortalyǵynda 2 971 ótinim qabyldanǵan. Onyń ishinde 2 512-si tolyq oryndaldy. Qatystylyǵyna qaraı 385 ótinim tıisti mekemelerge joldansa, 74 ótinishtiń oryndalý merzimi jalǵasýda. Bul júıeniń basty artyqshylyǵy – árbir azamattyń ótinishiniń onlaın tirkelýi jáne onyń oryndalý barysyn qadaǵalaý múmkindigi.
Azamattardy qabyldaý ortalyǵy arqyly bıylǵy jyldyń basynan beri 25 401 qyzmet kórsetildi. Sonymen qatar, halyqqa qyzmet kórsetý ortalyǵynyń (HQKO) qyzmetkerleri arqyly 955 qyzmet usynyldy. Bul ortalyqtarda turǵyndarǵa qujat rásimdeý, anyqtama alý, áleýmettik tólemderdi taǵaıyndaý syndy túrli qyzmetter bir tereze qaǵıdasymen kórsetiledi.

Qala ákimdigine qarasty bólimder tarapynan osy kezeńde jalpy 30 435 memlekettik qyzmet usynylǵan. Onyń ishinde: «Egov» portaly arqyly – 11 304 qyzmet, elektrondy formatta – 14 799 qyzmet, tikeleı qabyldaý arqyly – 54 qyzmet, HQKO arqyly – 4 261 qyzmet, sondaı-aq balamaly túrde kórsetýge múmkindik bola tura, tikeleı formatta – 9 qyzmet kórsetilgen. Bul sandar óńir turǵyndarynyń elektrondy qyzmetke degen suranysy artyp kele jatqanyn aıǵaqtaıdy.

Tsıfrlandyrý úderisiniń tıimdiligin arttyrý maqsatynda oblysta birqatar jańa jobalar da qolǵa alynǵan. Mysaly, memlekettik mekemelerde qyzmet kórsetý sapasyn baǵalaý júıesi engizilip, ár azamat óz pikirin onlaın qaldyra alady. Bul óz kezeginde mekeme jumysyna táýelsiz baqylaý ornatýǵa jáne halyqtyń senimin nyǵaıtýǵa yqpal etedi.

Memlekettik qyzmetterdi elektrondy formatqa kóshirý – tek ýaqytty únemdeý ǵana emes, sonymen qatar memlekettik apparattyń tıimdiligin arttyrýdyń mańyzdy joly. Prezıdent Joldaýynda da bul baǵyt aıqyn kórsetilgen. Tsıfrlyq transformatsııa, jasandy ıntellekt múmkindikterin engizý, derekterdi qorǵaý júıesin jetildirý – aldaǵy jyldardyń negizgi mindetteri.
Túrkistan qalasynda atqarylyp jatqan jumystar osy strategııalyq maqsattarmen tolyq úndesedi. Qyzmet kórsetý sapasyn arttyrý, turǵyndarmen keri baılanysty nyǵaıtý, árbir ótinishtiń oryndalýyn qatań baqylaýda ustaý – ákimdik jumysynyń negizgi baǵyttarynyń biri bolyp otyr.

Jergilikti ákimdik pen tıisti mekemeler aldaǵy ýaqytta da memlekettik qyzmetterdiń basym bóligin elektrondy formatqa kezeń-kezeńimen kóshirýdi jalǵastyrmaq. Sonymen qatar, tsıfrlyq saýattylyqty arttyrý boıynsha da jumystar júrgizilýde. Bul maqsatta mektepterde, kitaphanalarda, halyqqa qyzmet kórsetý ortalyqtarynda arnaıy kýrstar men keńes berý alańdary uıymdastyrylyp keledi.

Tsıfrlandyrý qarqynynyń artýy – Túrkistandy zamanaýı, ashyq ári tıimdi basqarý úlgisi bar óńirge aınaldyrýdyń mańyzdy kepili. Bul tek ákimdiktiń ǵana emes, búkil qoǵamnyń ortaq múddesi. Óıtkeni, árbir turǵyn memlekettik qyzmetti yńǵaıly, jyldam jáne ádil túrde alýǵa quqyly. Al osy quqyqtyń tolyq júzege asýy – tsıfrlandyrýdyń basty nátıjesi bolmaq.

Aıta keteıik, budan buryn Túrkistanda aqyldy aıaldamalar salynatyndyǵyn jazǵan bolatynbyz.