Túrkistanda eki qurylys kompanııacy turǵyn úılerdi zańsyz jarnamalaǵan
TÚRKІSTAN. KAZINFORM – Túrkistan oblysynda turǵyn úı qurylysyna úlestik qatysý týraly zańnama talaptaryn buzǵan qurylys kompanııalary belgili boldy.
Oblystyq memlekettik sáýlet-qurylys baqylaýy basqarmasynyń málimetinshe, monıtorıng barysynda bıyl Túrkistan qalasynda tıisti ruqsatsyz, ıaǵnı turǵyn úı qurylysyna úlestik qatysýǵa kepildik berý týraly shartsyz azamattarǵa jarnama jasaǵan eki qurylys kompanııasy anyqtalǵan.
– Atalǵan kompanııalar qoldanystaǵy zań talaptaryn buza otyryp, qurylysy aıaqtalmaǵan kóppáterli turǵyn úılerdi satý maqsatynda áleýmettik jelilerde jarnama taratqan. Osyǵan baılanysty Ákimshilik quqyqbuzýshylyq týraly kodekske sáıkes «SK TRANSSTROY» jáne «KERUEN CITY» JShS-larynyń árqaısysyna 1 081 250 teńge kóleminde aıyppul salyndy, – dedi basqarma basshysynyń mindetin atqarýshy Tartý Baıtursynov.
Spıkerdiń aıtýynsha, qurylysy aıaqtalmaǵan turǵyn úılerge jarnama jasaýǵa qatysty belgili talaptar bar.
– «Turǵyn úı qurylysyna úlestik qatysý týraly» zańǵa sáıkes, qurylys salýshy turǵyn úı jobasyn tek kepildik berý qorynyń kepildigi bolǵan jaǵdaıda nemese jergilikti atqarýshy organnyń ruqsatymen ǵana jarnamalaı alady. Bul talaptar saqtalmasa, jarnama zańsyz dep tanylady, – dedi ol.
Aıta keteıik, ótken jyly óńirde zańsyz jarnamaǵa baılanysty úsh kompanııa anyqtalǵan. Atap aıtqanda «Prime BUILDER», «TAU CONSTRUCTION LLP» jáne «ALI CONSTRUCTION GROUP» seriktestikteriniń árqaısysyna 589 800 teńge kóleminde aıyppul salynǵan. Olardyń barlyǵy oblys ortalyǵynda qurylys júrgizgen.
Budan buryn Túrkistan oblysynda 113 myńnan asa azamat turǵyn úı kezeginde turǵanyn jazǵan edik.
