Túrkistanda eki kún ishinde kóshi-qon zańyn buzǵan 118 sheteldik elden shyǵaryldy
TÚRKІSTAN. KAZINFORM — Túrkistan oblysynda reıdtik is-shara kezinde kóshi-qon zańyn buzýdyń 300-den asa deregi tirkeldi.
Túrkistan oblysynda kóshi-qon salasyndaǵy quqyq buzýshylyqtardyń aldyn alý jáne olardy anyqtaý maqsatynda reıdtik-profılaktıkalyq is-shara ótip jatyr.
Oblystyq polıtsııa departamentiniń málimetinshe, eki táýlik ishinde óńirde kóshi-qon zańyn buzýdyń 344 deregi anyqtaldy.
— Onyń ishinde 242 quqyq buzýshylyq shetel azamattaryna qatysty boldy. Atalǵan tulǵalarǵa ákimshilik hattamalar toltyrylyp, materıaldar sotqa joldandy. Sot sheshimimen 118 quqyq buzýshy el aýmaǵynan shyǵaryldy, — delingen resmı habarlamada.
Sondaı-aq shetel azamattarynyń Qazaqstanda bolý tártibin qamtamasyz etpegen 71 qabyldaýshy tarap jaýapqa tartyldy. Budan bólek, sheteldik jumys kúshin zańsyz tartqan 31 Qazaqstan azamatyna qatysty tıisti sharalar qoldanyldy.
— Máselen, Keles aýdanynda kóshi-qon qyzmetiniń ınspektorlary men ýchaskelik polıtsııa qyzmetkerleri birlesip júrgizgen tekserý barysynda ruqsat qujattarynsyz qurylys jumystaryn atqaryp júrgen 17 shetel azamatynan quralǵan jumys toby anyqtaldy. Qazirgi tańda atalǵan fakti boıynsha materıaldar jınaqtalyp, sotqa jiberildi. Sondaı-aq, olardy jumysqa tartqan qabyldaýshy tarap anyqtalyp jatyr, — dep málimdedi vedomstvo.
Іs-shara barysynda polıtsııa qyzmetkerleri shetel azamattary men jumys berýshiler arasynda kóshi-qon zańnamasyn saqtaý qajettiligi týraly túsindirý jumystaryn da júrgizdi.
Budan buryn Almatyda kóshi-qon zańyn buzǵan 35 sheteldik elden shyǵarylǵanyn jazǵan edik.