Túrkistanda eki batareıka jutyp qoıǵa toǵyz aılyq sábıge ota jasaldy
TÚRKІSTAN. KAZINFORM – Túrkistan oblystyq balalar aýrýhanasyna toǵyz aılyq sábı aýyr jaǵdaıda jetkizildi. Tekserý barysynda onyń eki batareıka jutyp qoıǵany anyqtaldy.
Dárigerler shuǵyl ota jasap, bógde zattyń birin alyp shyqty. Al ekinshisi ishek jolyna ótip ketkendikten, mamandar sábıdiń jaǵdaıyn baqylaýda ustady. Birneshe kúnnen keıin batareıka tabıǵı jolmen shyqqan.
– Otadan keıin sábı úsh táýlik jansaqtaý bóliminde em qabyldady. Qazirgi tańda onyń jaǵdaıy turaqty, – dep habarlady oblystyq Densaýlyq saqtaý basqarmasy.
Dárigerler ata-analarǵa usaq zattardy, onyń ishinde batareıka men magnıtterdi balalardyń qoly jetpeıtin jerde saqtaý qajettigin eskertti.
Buǵan deıin Almatyda bala jutyp qoıǵan úsh magnıt asqazan men ishekti jalǵap jibergenin habarlaǵan edik.
