Túrkistanda eki balasyn óltirgen kelinshek eshqandaı dıspanserde esepte turmaǵan, úlgili muǵalim bolǵan
QYZYLORDA. KAZINFORM - Túrkistan qalasynda bolǵan eki balanyń ólimine kúdikti dep tanylǵan azamatsha eshqandaı dıspanserlik esepte turmaǵan. Ujym, ata-ana jáne oqýshylarmen qarym-qatynasy birqalypty bolǵan.
Oqıǵa 7 aqpanda Túrkistan qalasynda bolǵan. Jaldamaly páterlerdiń birinen eki sábıdiń denesi tabyldy.
Oǵan Qyzylorda oblysy Shıeli aýdanynyń turatyn azamatsha, balalardyń anasy kúdikti dep tanyldy. Ol Shymken qalasyndaǵy qonaq úıdiń birinen ustaldy.
Keıbir derek kózderinde azamatshanyń muǵalim bolyp qyzmet atqarǵany aıtyldy.
Bul derekti Qyzylorda oblystyq bilim basqarmasynyń basshysy Asqarbek Esjanov rastady.
«Túrkistan qalasynda bolǵan balalar ólimine qatysty kúdikti dep tanylǵan azamatsha Shıeli aýdanyndaǵy bilim berý uıymynda 2014 jyldan beri muǵalim qyzmetin atqaryp kelgen. Oqıǵa bolǵan 7 aqpan kúni mektep ákimshiligine eskertpesten jumysqa barmaǵan. Mektep ákimshiligi ol azamatshanyń ujym, ata-analar jáne oqýshylarmen til tabysýy, jaıly minezimen erekshelengenin aıtady. Sondaı-aq pedagogıkalyq qyzmetinde balalardy oqytý men tárbıeleýde birqatar jetistikke jetken. Tıisti alǵys hattarmen marapattalǵan. Áriptesteriniń aıtýynsha, minezinde eshqandaı aýytqý bolmaǵan. Qandaı da bir dıspanserlik esepte turmaıdy. Ózi tolyqqandy otbasy, ata-enesi, jubaıymen birge turǵan. Qazir ishki ister organdarynda bul boıynsha qylmystyq is tirkelgen. Qorytyndysy tergeý amaldarynan keıin belgili bolady», — dedi basqarma basshysy.
