Túrkistanda dástúrli tamyz konferentsııasy ótti: jańa oqý jyly – jańa mindetter kezeńi
TÚRKІSTAN. KAZINFORM — Jańa oqý jyly qarsańynda Túrkistanda «Bilim keleshegi: adal azamat, kásibı maman» taqyrybynda dástúrli oblystyq tamyz pedagogıkalyq keńesi ótti. Mańyzdy jıynǵa kelgen oblys ákimi Nuralhan Kósherov bastaǵan óńirdegi túrli sala basshylary aldymen ınnovatsııalyq jobalardyń kórmesin aralady.
Kórmede túrli ǵylymı oqýlyq, mektepterge arnalǵan ıntegratsııalanǵan tsıfrlyq ekojúıe, Qazaqstandaǵy oqýshyǵa arnalǵan alǵashqy JI repetıtor, kásibı baǵdar berý jáne psıhologııalyq qoldaý kórsetetin startap jáne basqa da ınnovatsııalyq jobalar tanystyryldy. Sondaı-aq jumysshy mamandardy daıarlaıtyn tehnıkalyq jáne kásiptik, orta bilimnen keıingi bilim berý uıymdary men bilim berý uıymdarynyń jobalary usynyldy.
Tamyz keńesine Oqý-aǵartý birinshi vıtse-mınıstri Maıra Meldebekova, «NZM» Pedagogıkalyq sheberlik ortalyǵynyń dırektory Tolqyn Aıdosova, oblys prokýrorynyń orynbasary Dáýlet Tlemısov, sondaı-aq «Samuryq-Qazyna» qorynyń «KAP Logistics» kompanııasynyń dırektory Aıdos Týralıev qatysty. Plenarlyq otyrysqa 1000-ǵa jýyq ustaz tikeleı qatysyp, 20 myńnan astam pedagog onlaın formatta tamashalady. Jıyndy Túrkistan oblysy bilim basqarmasy basshysynyń m. a. Ǵalymjan Orynov júrgizdi.
Túrkistan oblysynyń ákimi Nuralhan Kósherov jıynǵa arnaıy qatysyp, pedagogtardy jańa oqý jylymen quttyqtady. Óz sózinde ol bilim berý salasyna memleket tarapynan kórsetilip jatqan qoldaý men qoǵam aldyndaǵy jaýapkershilik týraly aıtty. Túrkistan oblysynda bilim salasynda jetken jetistiktermen bólisti. Sondaı-aq jańa oqý jylynda atqarar ilkimdi josparlarǵa toqtaldy. Atap aıtqanda, Túrkistanda álemge tanymal Ońtústik Koreıanyń «Woosong Kazakhstan» IT — ýnıversıteti lıtsentsııa alyp, ashyldy. Bul joǵary oqý ornyna oblys ákimdigi 100 grant bóldi.
– Tamyz keńesiniń taqyryby kezdeısoq tańdalmaǵan. Bul — qazirgi qoǵam men zamanaýı bilim júıesiniń ózekti talaby. Memleket basshysy Qasym-Jomart Toqaev: «Bilim berý — ulttyq qaýipsizdiktiń basty tiregi, al ustaz — sol irgeni ustap turǵan eń úlken kúsh» dep atap ótti. Búginde bizge tek bilimdi emes, eljandy, ádil, jaýapkershiligi joǵary azamattar qajet. Sondyqtan ustaz eńbegi — ult bolashaǵyna baǵyttalǵan eń mańyzdy eńbek. 2024 jyly bilim berý salasyna 747,7 mlrd teńge bólindi. Bul — jalpy oblystyq bıýdjettiń 55%-yn quraıdy. Bul — bolashaq urpaqqa salynǵan naqty ınvestıtsııa. Oblysta 6 jasqa deıingi balalardy mektepke deıingi tárbıemen qamtý kórsetkishi 99%-ǵa jetti. Bul elimizdegi eń joǵarǵy kórsetkish. Oblystyq bıýdjet esebinen jańa 17 bilim nysanynyń qurylysy júrgizilýde. Balalardyń jazǵy demalysyna erekshe kóńil bólinip, 5 memlekettik lagerge jóndeý júrgizilip, 5 lagerge qosymsha modýldik ǵımarattar salyndy. Sondaı-aq bıyl alǵash ret jyl boıy jumys júrgizetin «Alataý» oqý-saýyqtyrý ortalyǵy ashyldy. Bul úlken jetistik. Endigi negizgi mindet — sapa, ashyqtyq jáne qarjylyq tártipti kúsheıtý. Jańa oqý jyly — bilim salasyndaǵy tyń bastamalar men úlken jaýapkershilik kezeńi. Balalarymyzdyń jan-jaqty damýyna jaǵdaı jasaý — bárimizdiń ortaq mindetimiz. Ustazdar — sol joldaǵy eń negizgi tirek. Jańa oqý jyly tabysty bolsyn! — dedi Túrkistan oblysynyń ákimi Nuralhan Kósherov.
Túrkistan oblysynda «Keleshek mektepteri» ulttyq jobasy aıasynda 29 jańa jaıly mekteptiń qurylysy aıaqtalýda. Ótken jyly 13 mektep paıdalanýǵa berildi. Jyl sońyna deıin taǵy 16 mektep ashylady. Bul — úsh aýysymdyq jáne apatty mektepter máselesin sheshýge naqty qadam. Sondaı-aq aýyl men qala balalaryna jaıly mektepterde bilim alýyna teń múmkindik jasalady. Memleket basshysynyń «Mektepterdi jańǵyrtý» (renovatsııa) tapsyrmasyna oraı, úsh jylda 115 mektep jańartýdan ótetin bolady. Bıyl oblysta 100 mektep jóndeýden ótýde.
2024 jyldan bastap engen vaýcherlik qarjylandyrý pılottyq jobasy ashyq pen qyzmet sapasyn arttyrýǵa múmkindik berdi. Bul júıe barlyq balabaqshalarda iske qosylyp, qarjynyń tıimdi ári ashyq jumsalýyna múmkindik berip otyr. Oqýshylardyń qaýipsizdigi — basty nazarda. Mektepterde beınebaqylaý, týrnıket, dabyl túımeleri, kúzet júıesi tolyq ornatylǵan. Bul maqsatqa 2023-2024 jyldary 3 mlrd teńge bólingen.
Jańa mamandyqtar men dýaldy oqytý boıynsha Prezıdent tapsyrmasyna saı 6 jańa jumysshy mamandyq ashyldy. 35 kolledj 654 kásiporynmen kelisimshartqa otyryp, dýaldy oqytý júıesin engizdi. Bıyl kolledjderge 15 500 grant bólinse, sonyń 9500-i jumysshy mamandyqtarǵa baǵyttalǵan.
Bul — jyl saıyn ótetin, bilim berý salasyndaǵy ózekti máseleler men jańa baǵyttardy talqylaıtyn mańyzdy dıalog alańy.
Keńes sońynda salada erekshe eńbek etken pedagogter men mamandar marapattaldy. Ustazdar «Eren eńbegi úshin» medalimen, Túrkistan oblysy ákiminiń alǵys hatymen, «Bilim berý isiniń qurmetti qyzmetkeri» tósbelgisimen jáne Oqý-aǵartý mınıstrliginiń alǵys hatymen marapattaldy.