Túrkistanda dárigerler 28 myńnan asa jalǵan konsýltatsııa jasap, 91 mln teńge alǵan

Túrkistan oblysynyń prokýratýrasy memlekettik jáne jekemenshik medıtsınalyq uıymdardy tekserý barysynda mindetti áleýmettik medıtsınalyq saqtandyrý júıesinde qarajatty zańsyz alý jáne jumsaý faktilerin anyqtady.

Lıtsenzııasyz konsýltatsııalyq-dıagnostıkalyq qyzmetterdi sapasyz ári tıisti deńgeıde kórsetpeý jaǵdaılary belgili boldy. Máselen, oblystaǵy jekemenshik klınıkalardyń birinde ruqsat qujattarynsyz «oftalmolog», «gastroenterolog», «allergolog», «ýrolog», «psıhıatr», «gematolog», «genetık», «qan tamyrlary hırýrgy», «neırohırýrg», «nefrolog», «ınfektsıonıst», «nevropatolog», «endokrınolog», «hırýrg», «kardıolog», «ftızıatr», «rentgenolog», «revmatolog», «onkolog» mamandarynyń atynan 28 myńnan astam konsýltatsııa kórsetilip, 91 mln teńge kóleminde qarajat alynǵan.

Atalǵan fakt boıynsha materıaldar Qylmystyq kodekstiń 214-baby boıynsha sotqa deıingi tergep-tekserýlerdiń biryńǵaı tizilimine tirkelip, tergeýdi aýmaqtyq Ekonomıkalyq tergep-tekserý departamenti júrgizgen. Tergeý nátıjesinde keltirilgen zalal tolyq ótelýine baılanysty is aqtalmaıtyn negizder boıynsha toqtatyldy.

Sonymen qatar 203 mln teńge kóleminde stomatologııalyq qyzmetterdi jalǵan kórsetý faktileri anyqtaldy. Eki affılırlengen klınıka ózderine formaldy túrde úsh dárigerdi rásimdep, elektrondyq tólem júıesine júkti áıelder men balalarǵa kórsetilgendeı etip 40 myń jalǵan stomatologııalyq qyzmet engizgen.

— Tekserý barysynda bir stomatologtyń bir kúnde ártúrli klınıkalarda bir mezgilde ondaǵan patsıentke «qyzmet kórsetkeni» tirkelgen. Qarsy tekserýler men patsıentterden alynǵan jaýaptar mundaı derekterdiń jalǵan ekenin rastady. Atalǵan faktiler boıynsha arnaıy prokýrorlar Qylmystyq kodekstiń 190-baby boıynsha sotqa deıingi tergep-tekserý júrgizip, materıaldar sotqa joldandy, — delingen prokýratýra taratqan aqparatta.

Osyǵan deıin Almaty oblysynda stomatologııa 66 mln teńge jymqyrǵanyn jazǵanbyz.