Túrkistanda birqatar nysannyń qurylysy iske asady – mınıstrlik

ASTANA. KAZINFORM – Búgin Senattyń jalpy otyrysynda Ulttyq ekonomıka vıtse-mınıstri Arman Qasenov bıyl Túrkistan qalasynda salynatyn nysandar týraly aıtyp berdi.

Búgin Senattyń jalpy otyrysynda «Túrkistan qalasynyń erekshe mártebesi týraly» zańy men ilespe qujat maquldandy.

Onyń sózine qaraǵanda, bul zań qabyldanbaı turǵannyń ózinde Túrkistandy damytýǵa erekshe kóńil bólindi. 2018 jyly respýblıkalyq bıýdjetten bólingen nysanaly transfertter 13 mlrd teńge, 2024 jyly 72 mlrd teńge boldy, ıaǵnı 6 jylda qalany qarjylandyrý 5,5 esege ósti.

- Bul óz kezeginde oń áser etti. Óıtkeni, qalanyń jalpy óńirlik ónimi 6 ese, ónim shyǵarý 10 ese, qalanyń jeke kirisi 14 ese ósti, - dedi Arman Qasenov.

Onyń aıtýynsha, 2025 jyly myna jobalardyń qurylysy iske asady:

— «Parasat» jáne «Astana» saıabaqtarynyń qurylysy jáne rekonstrýktsııasy. Bul maqsatqa 10 mlrd teńge bólindi;

— «Túrkistan» arnaıy ekonomıkalyq aımaǵynda ınjenerlik ınfraqurylymdy salý. Bul jumysqa bastapqyda 7 mlrd teńge josparlanǵan;

— 3 mlrd teńgege olımpıadalyq rezervtegi jasóspirimder sport mektebi úshin sport kesheniniń qurylysy;

— quny 4 mlrd teńgege sport keshenderi bar eskek esý kanalynyń qurylysy;

— ıppodromy bar kóp fýnktsıonaldy keshen, 13 mlrd teńge qarastyrylǵan.

Budan buryn habarlanǵandaı, Týrızm jáne sport vıtse-mınıstri Erjan Erkinbaev Túrkistan qalasynyń týrızmin damytýdyń bólek keshendi jospary daıarlanatynyn aıtty.