Túrkistanda biryńǵaı dızaın-kod engizý josparlanǵan
ASTANA. KAZINFORM — Túrkistan qalasynyń biryńǵaı sáýlet-kórkemdik kelbetin qalyptastyrýǵa baǵyttalǵan «Túrkistan qalasynyń dızaın-kodyn bekitý týraly» ákimdik qaýlysynyń jobasy qoǵamdyq talqylaýǵa shyǵaryldy, dep habarlaıdy Kazinform tilshisi.
Qujatty Túrkistan qalasy ákimdigi sáýlet jáne qala qurylysy bóliminiń memlekettik mekemesi ázirlegen. Jobany talqylaý 2026 jylǵy 9 maýsymǵa deıin jalǵasady.
Joba materıaldaryna sáıkes, dızaın-kod qalanyń sáýlettik kelbetin júıeleýge jáne qalalyq ortanyń syrtqy bezendirilýine biryńǵaı talaptar belgileýge baǵyttalǵan.
Atap aıtqanda, qujat ǵımarattardyń qasbetterin bezendirý, syrtqy jarnamalardy ornalastyrý, abattandyrý elementteri men shaǵyn sáýlet nysandaryna qatysty tásilderdi aıqyndaıdy. Sondaı-aq Túrkistannyń tarıhı-mádenı erekshelikterin saqtaý jáne onyń týrıstik tartymdylyǵyn arttyrý kózdelgen.
Joba qala aýmaǵynda biryńǵaı sáýlet-kórkemdik kelbetti qalyptastyrýdy maqsat etedi. Ol ǵımarat qasbetterine, syrtqy jarnamaǵa jáne abattandyrý elementterine qoıylatyn talaptardy belgileıdi.
Qujatty qabyldaý qalalyq ortanyń estetıkalyq sapasyn arttyryp, qala aýmaǵynda sáýlet talaptarynyń birizdi qoldanylýyn qamtamasyz etýge múmkindik beredi.
Jobany kezeń-kezeńimen júzege asyrý 2026 jyldyń ekinshi jartyjyldyǵynan bastalady. Nátıjesinde qalalyq ınfraqurylymnyń kelbeti jaqsaryp, turǵyndar men týrıster úshin qolaıly orta qalyptasady dep kútiledi.
Buǵan deıin Túrkistanda Túrki órkenıeti ortalyǵy boı kóteretinin jazǵan bolatynbyz.
