Túrkistanda brakonerlerden qarý-jaraq tárkilendi

TÚRKІSTAN. KAZINFORM - Jergilikti polıtsııa qyzmetiniń polıtseıleri kóliktegi kúdikke ilingen 4 er adamdy polıtsııa bólimine jetkizdi. Olar Jambyl oblysynyń turǵyndary bolyp shyqty.

Oqıǵa Sozaq aýdanynda boldy. Aýdandyq polıtsııa bólimine habar bergen «ohotzooprom» ınspektory kúdikti kólikti tekserý kerektigin aıtqan. Oqıǵa ornyna jedel jetken polıtsııa qyzmetkerleri QR Qyzyl kitabyna engen jabaıy janýarlardy zańsyz aýlaý deregin anyqtady. Nátıjesinde kúdiktilerden «toyota land cruiser» kóligi, 16 aqbókenniń óleksesi men 13 múıizi, 2 dana pyshaq, 58 dana ańshy myltyǵynyń oǵy men ańshy myltyǵy jáne dúrbi, 12 kalıbri eki uńǵyly 2 myltyq, 4 dana jaryqtandyrǵysh zattaı dáleldeme retinde tárkilendi.

«Tıisti saraptama taǵaıyndaldy. Bul jaıt janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý boıynsha tirkeldi. Qazir oqıǵanyń mán-jaıy anyqtalýda» - delingen Túrkistan oblysy polıtsııa departamentiniń baspasóz qyzmeti usynǵan aqparatta.

Aıta keteıik, budan buryn jubaıynyń týysyna 19 jerinen pyshaq salǵan túrkistandyq kúdikti izdestirilip jatqanyn jazǵan bolatynbyz.