Túrkistanda bir synyptyń eki oqýshysy UBT-dan 140 ball aldy
TÚRKІSTAN. KAZINFORM — Túrkistan qalasyndaǵy jekemenshik mektepterdiń birinde oqıtyn 11 synyp oqýshylary Aısultan Jańbyrbaı men Jasýr Nyshanbaev Ulttyq biryńǵaı testileýden eń joǵary nátıje — 140 upaı jınady.
Oblystyq bilim basqarmasynyń málimetinshe, eki oqýshy da bir synypta bilim alǵan, birdeı beıindik pánderdi tańdaǵan jáne bolashaq mamandyqtary da uqsas.
— Túlekter UBT-da dúnıejúzi tarıhy men aǵylshyn tili pánderin tańdaǵan. Sonymen qatar, halyqaralyq IELTS emtıhanynan 6,5 ball ıelengen, — delingen Túrkistan oblysy bilim basqarmasy taratqan aqparatta.
Jasýr Nyshanbaev — Túrkistan qalasynyń turǵyny. Ol qańtar aıyndaǵy alǵashqy UBT-da 120 ball jınasa, naýryz aıyndaǵy testileýde nátıjesin 128 balǵa deıin kótergen. Al mamyr aıyndaǵy negizgi testileýde úzdiksiz daıyndyqtyń nátıjesinde 140 ballǵa qol jetkizdi.
Al Aısultan Jańbyrbaı Shymkent qalasynan arnaıy kelip, mektep jataqhanasynda turyp bilim alǵan. Ol qańtardaǵy testileýde 125 ball, naýryz aıynda 128 ball jınap, ár kezeń saıyn nátıjesin jaqsartyp otyrǵan. Nátıjesinde sońǵy UBT-da tolyq 140 upaı ıelendi.
UBT erejesine sáıkes, talapker halyqaralyq sertıfıkattalǵan aǵylshyn tili emtıhandarynan joǵary nátıje kórsetken jaǵdaıda, beıindik nemese mindetti aǵylshyn tili páninen bosatylady. Atap aıtqanda, IELTS halyqaralyq emtıhanynan belgilengen deńgeıden joǵary ball alǵan túlekterge UBT-daǵy aǵylshyn tili bólimi avtomatty túrde esepteledi.
Jańbyrbaı Aısultan men Nyshanbaev Jasýr IELTS emtıhanynan 6,5 ball jınaǵan. Osy kórsetkish negizinde olar aǵylshyn tili páni boıynsha test tapsyrmaǵanymen, UBT júıesinde sol pánniń tolyq upaıy avtomatty túrde berilgen. Nátıjesinde talapkerler test barysynda qalǵan pánderden qoıylǵan 90 suraqtyń 90-na da durys jaýap berip, jalpy 140 upaı ıelendi.
Qos túlek te Maqsut Narikbayev University tańdaǵan. Olar bolashaqta aýdarma isi mamandyǵy boıynsha bilim alyp, halyqaralyq deńgeıde qyzmet etýdi maqsat etedi.
Budan buryn atyraýlyq túlektiń UBT-dan 140 upaı jınaǵanyn jazǵan edik.
