Túrkistanda bilim ınfraqurylymy jańartylyp jatyr
TÚRKІSTAN. KAZINFORM — Túrkistan qalasynda bilim berý salasyna erekshe kóńil bólinip keledi. Oqý sapasyn arttyrýmen qatar, oqý oryndarynyń ınfraqurylymyn jańartý, tsıfrlandyrý jáne zamanaýı bilim keńistigin qalyptastyrý baǵytynda júıeli jumystar qolǵa alynǵan.
Qazirgi ýaqytta qala aýmaǵyndaǵy tórt mektepte kúrdeli jóndeý jumystary júrgizilip jatyr. Bul — qalanyń bilim berý áleýetin arttyrý jolyndaǵy mańyzdy qadamdardyń biri. Túrkistan qalasynyń ákimi Ázimbek Pazylbekuly kúrdeli jóndeýden ótip jatqan birqatar bilim berý uıymdaryn aralap, qurylys-montaj jumystarynyń barysymen tanysty. Ákim sapa men merzimdi basty nazarǵa alyp, jaýapty merdigerlerge naqty tapsyrmalar júktedi.
Aldymen qala basshysy № 9 Nekrasov atyndaǵy jalpy orta mektepke bardy. Bul bilim ordasynda búginde 2700-den astam oqýshy bilim alýda. Mektep ǵımaraty uzaq jyldar boıy kúrdeli jóndeý kórmegen. Qazirgi tańda mekemede qurylys jumystary qyzý júrip jatyr. Nysan tolyq jańǵyrtylyp, zamanaýı standarttarǵa sáıkestendirilmek. Mektepke oqýshylar men ustazdardyń yńǵaılylyǵyn qamtamasyz etetin jańa esikter men terezeler, jaryq ári jyly synyptar, zamanaýı sanıtarlyq toraptar ornatylady.
Sonymen qatar, ǵımarat ishine STEM baǵytyndaǵy oqý kabınetteri, ІT synyptar, tsıfrlyq laboratorııalar men robototehnıka kabınetteri engizilmek. Mundaı zamanaýı oqý keńistigi — balalardyń shyǵarmashylyq jáne logıkalyq oılaý qabiletin damytýdyń tıimdi quraly sanalady.
Odan keıin qala ákimi S. Erýbaev atyndaǵy № 7 mektep-ınternaty men № 31 Abaı atyndaǵy jalpy orta mekteptegi qurylys jumystarynyń barysyn baqylady. Bul nysandarda da kúrdeli jóndeý jumystary qarqyndy júrgizilip jatyr. Atap aıtqanda, jylý júıesi men elektr jelileri jańartylyp, sport zal, ashana jáne kitaphana bólmeleri zamanaýı úlgide qaıta jasaqtalady. Sonymen qatar, ınklıýzıvti bilim berýdi damytý maqsatynda mektepterge pandýstar men arnaıy sanıtarlyq toraptar ornatylyp jatyr.
Nysandardy aralaý barysynda qala ákimi qurylys sapasyna erekshe toqtaldy.
Mektep — bul jaı ǵana ǵımarat emes. Ol — bolashaqtyń irgetasy qalanatyn oryn. Sondyqtan árbir bólshek mańyzdy. Sapasyz jumysqa jol berilmeıdi. Qurylystyń qaýipsizdigi men oqýshylardyń jaılylyǵy basty orynda bolýy tıis, — dedi Ázimbek Pazylbekuly.
Ol jaýapty qurylys kompanııalaryna naqty merzimder men sapa kórsetkishteri boıynsha talap qoıyp, jóndeý jumystary oqý jyly bastalǵanǵa deıin aıaqtalýy tıis ekenin eskertti. Sonymen qatar, mektepterde tsıfrlyq jabdyqtardy ornatý, ınteraktıvti taqtalar men smart-synyptarmen qamtamasyz etý máselesi de nazardan tys qalmady.
Qazirgi bilim berý júıesi tek dástúrli oqýmen shektelmeıdi. Tsıfrlyq tehnologııalardyń damýyna baılanysty mektepterde ınteraktıvti qurylǵylar, onlaın platformalar, elektrondy kúndelik pen jýrnaldar keńinen qoldanylyp jatyr. Túrkistan qalasynda da bul baǵytta birqatar bastama júzege asyrylyp keledi.
Jóndeýden keıin atalǵan mektepterge tolyqtaı ınternet jelisi tartylyp, joǵary jyldamdyqty Wi-Fi ornatylady. Ár synyp zamanaýı smart-paneldermen, tsıfrlyq oqý quraldarymen jabdyqtalady. Buǵan qosa, oqýshylardyń ІT saýattylyǵyn arttyrýǵa baǵyttalǵan baǵdarlamalaý, grafıkalyq dızaın, 3D-modeldeý syndy úıirmeler ashylmaq.
Bul bastamalar el Prezıdenti Qasym-Jomart Toqaevtyń «Tsıfrlyq Qazaqstan» baǵdarlamasy aıasyndaǵy bilim salasyn tsıfrlandyrý jónindegi tapsyrmalaryna tolyq sáıkes keledi. Bilim salasyn ınnovatsııalyq baǵytta damytý — óńirdiń áleýmettik áleýetin arttyryp, jańa býynnyń jahandyq eńbek naryǵynda básekege qabiletti bolýyna jol ashady.
Jalpy, Túrkistan qalasynda 38 mektep jumys isteıdi. Onyń 33-i eki aýysymda, 5 mektep bir aýysymda bilim beredi. Qazirgi ýaqytta 4 mektepte kúrdeli jóndeý júrgizilip jatyr. Bul jumystardyń barlyǵy jańa oqý jyly qarsańynda aıaqtalyp, oqýshylar men ustazdar jańa ári jaıly ortada oqý jylyn bastaıdy dep kútilýde.
Bilim — kez kelgen memlekettiń bolashaǵyn aıqyndaıtyn basty sala. Túrkistan qalasy ákimdigi osy salaǵa erekshe nazar aýdara otyryp, tek ǵımarattardy jóndeýmen shektelmeı, oqý protsesine ınnovatsııalyq ádisterdi engizýge de umtylyp otyr. Qala basshylyǵynyń bul bastamasy óńirdiń bilim sapasyn arttyryp qana qoımaı, zamanaýı talaptarǵa beıimdelgen jas býyndy tárbıeleýge úlken serpin bereri sózsiz.