Túrkistanda bıyl ashylǵan Qolónershiler ortalyǵy jumys istemeı tur
TÚRKІSTAN. KAZINFORM — Bıyl qyrkúıek aıynda Túrkistan qalasynyń rýhanı-mádenı ortalyǵynda ornalasqan Qolónershiler qalashyǵynyń resmı ashylý saltanaty ótken bolatyn.
Alaıda qazirgi tańda atalǵan ǵımarattyń kireberisi arnaıy lentamen qorshalyp, jumys istemeı tur. Bul máselege qatysty Túrkistan qalasy ákimdigi resmı jaýap berdi.
— Qolónershiler ortalyǵy jeke ınvestordyń qarjysy esebinen salyndy. Kásipker óz qarajaty esebinen ǵımarattyń qurylysyn tolyq aıaqtady. Ortalyqtyń ashylý saltanaty ótip, sharaǵa qaladaǵy qolóner sheberleri men shyǵarmashylyq ókilderi qatysty. Qazirgi tańda qala qolónershilerin ǵımaratpen qamtamasyz etý maqsatynda memlekettik satyp alý protsesi júrgizilip jatyr, — delingen Túrkistan qalasy ákiminiń baspasóz hatshysy Aıgúl Álisher usynǵan aqparatta.
Aldaǵy ýaqytta memlekettik konkýrs nátıjesi anyqtalǵannan keıin nysan Túrkistan qalasy ákimdiginiń menshigine ótip, qolónershiler turaqty túrde ortalyq ǵımaratyna ornalastyrylady.
Budan buryn Túrkistanda Qolónershiler qalashyǵy ashylǵanyn jazǵan edik.
