Túrkistanda betin maskamen japqan eki er adam beınekameralardy qasaqana búldirdi
TÚRKІSTAN. KAZINFORM — Túrkistan qalasynda beınekameralardy qasaqana syndyrǵan eki kúdikti ustaldy. Qylmys beınebaqylaý júıeleriniń kómegimen ashyldy.
Oqıǵa qala kósheleriniń birinde bolǵan. Saldarynan 700 myń teńgeden astam materıaldyq shyǵyn keldi.
Polıtseıler qylmysty ashý barysynda jaqyn mańdaǵy beınebaqylaý júıeleriniń jazbalaryn muqııat zerdeledi. Kúdiktilerdiń qozǵalys baǵyty anyqtalyp, jedel-izdestirý sharalarynyń nátıjesinde olar qolǵa tústi.
— Tergeý barysynda oqıǵanyń túngi saǵat 01:00 shamasynda bolǵany anyqtaldy. Betin maskamen jasyrǵan eki azamat uzyn aǵashtyń kómegimen kameralardy isten shyǵarǵan. Atalǵan derek boıynsha bótenniń múlkin qasaqana joıý nemese búldirý faktisimen qylmystyq is qozǵaldy, — dep habarlady oblystyq polıtsııa departamenti.
Aldyn ala málimetke sáıkes, kúdiktiler jol erejesin buzǵany úshin salynǵan aıyppulǵa narazylyq bildirip, osy áreketke barǵandaryn moıyndaǵan.
Qazirgi tańda sotqa deıingi tergeý amaldary júrgizilip jatyr.
Budan buryn Almatyda urlanǵan múlikti zańsyz satqan tulǵalar ustalǵanyn jazǵan edik.
