Túrkistanda bes kúnde beldik taqpaǵan 1000-nan asa júrgizýshi jaýapqa tartyldy
TÚRKІSTAN. KAZINFORM — Túrkistan oblysynda jol qaýipsizdigin baqylaý sharalary kezinde qaýipsizdik beldigin taǵý talaptaryn buzýdyń 1011 faktisi tirkeldi. Jalpy bes kúnde 1727 quqyqbuzýshylyq anyqtalǵan.
Oblystyq polıtsııa departamentiniń málimetinshe, memlekettik tirkeý nómirlik belgileri oqylmaıtyn, talaptarǵa saı kelmeıtin nemese belgilenbegen orynǵa ornatylǵan kólik quraldaryn basqarǵany úshin 121 júrgizýshi jaýapkershilikke tartyldy.
Sondaı-aq memlekettik nómirsiz nemese zańnamada belgilengen tártippen tirkelmegen avtokólikterdi basqarýdyń 93 deregi anyqtaldy.
Budan bólek qoldan jasalǵan nemese jalǵan nómirlik belgilerdi ornatqany úshin 4 júrgizýshi, al jalǵan memlekettik tirkeý nómirlik belgileri bar kólikti basqarǵany úshin 8 júrgizýshi jaýapqa tartyldy.
— Jedel-profılaktıkalyq is-shara barysynda kólik júrgizý kezinde telefon paıdalanýdyń 448 deregi jáne qaýipsizdik beldigin taǵý talaptaryn buzýdyń 1011 faktisi anyqtaldy. Sonymen qatar qarsy baǵyttaǵy jolaqqa shyqqan 22 jáne mas kúıde kólik basqarǵan 20 júrgizýshige qatysty ákimshilik shara qoldanyldy, — delingen vedomstvo habarlamasynda.
Buǵan deıin Túrkistan oblysynda jol erejesin jıi buzǵan sheteldik júrgizýshi jaýapkershilikke tartylǵan edi.
