Túrkistanda bastaýyshtyń oqýshylary irgetasy shógip, edenderi shirigen mektepte oqyp kelgen
TÚRKІSTAN. KAZINFORM — Keles aýdanynda alty mektep jańartýdy qajet etedi.
Keles aýdanyna qarasty Eskiqorǵan aýylyndaǵy № 45 bastaýysh mektebi apatty jaǵdaıǵa jetken. 70 jyl buryn salynǵan ǵımarattyń irgetasy shógip, edenderi shirigen. Mektepte ashana, sportzal, kitaphana syndy negizgi qajettilikter múlde joq. Bar bolǵany eki synyp bólmesi ǵana jumys istep kelgen.
Aýyl turǵyndary mektep ǵımaraty kez kelgen sátte qulap, balalardy basyp qalýy múmkin ekenin aıtyp, dabyl qaǵyp jatyr.
Jergilikti turǵynnyń aıtýynsha, qabyrǵalar qısaıǵan, edende tesikter bar. Qurylys qyzyl kirpishten emes, balshyqtan salynǵan, irgetasy da joq. Jergilikti bılik bilim ordasynyń apatty jaǵdaıdy ekendigin eskere otyryp, № 45 mekteptiń oqýshylaryn ýaqytsha № 43 «Bolashaq» mektebine tasymaldaý týraly sheshim qabyldaǵanyn jetkizdi.
— Keles aýdanyna qarasty Eskiqorǵan eldi mekenindegi № 45 bastaýysh mektebiniń oqýshylary ýaqytsha 900 oryndyq № 43 «Bolashaq» mektebine tasymaldanatyn boldy. Bul sheshim eski ǵımarattaǵy oqýshylardyń qaýipsizdigin qamtamasyz etý maqsatynda qabyldandy. Qazirgi tańda Eskiqorǵan eldi mekeninen arnaıy jer telimi qarastyrylyp, qujattary tolyq daıyndalyp, memlekettik saraptamadan ótti. Joba respýblıkalyq bıýdjetke usynylyp, qarjy qaralǵan jaǵdaıda qurylys jumystary bastalatyn bolady, — delingen Keles aýdany ákimdigi usynǵan aqparatta.
Apatty jaǵdaıdaǵy № 45 bastaýysh mektebinde 1–4 synyp aralyǵynda 56 oqýshy bilim alyp kelgen, al mektep aldy daıarlyq tobynda 10 bala bar. Al kórshiles ornalasqan № 43 «Bolashaq» mektebinde 5–11 synyp aralyǵyndaǵy eskiqorǵandyq 326 oqýshy oqıdy. Endigi jerde osy bilim alýshylar tasymal arqyly bir mektepke shoǵyrlandyrylmaq.
— Keles aýdanynda jalpy alty mektepti jańartý qajettiligi bar. Barlyq nysanǵa qatysty qujattar daıyndalyp, qarjy bólý máselesi qaralyp jatyr, — deıdi ákimdiktegiler.
Buǵan deıin Túrkistandaǵy bilim salasyn tsıfrlandyrý jańa deńgeıge kóterilip kele jatqany aıtylǵan edi.