Túrkistanda basqarma basshysy qatysqan tóbelestiń vıdeosy tarady

TÚRKІSTAN. KAZINFORM — Áleýmettik jelilerde Túrkistan oblysynyń memlekettik sáýlet-qurylys baqylaý basqarmasy basshysynyń qatysýymen boldy delingen janjaldyń beınejazbasy tarady. Janjalǵa qatysýshylar polıtsııaǵa júginbegenine qaramastan, olardyń bireýine usaq buzaqylyq jasaǵany úshin aıyppul salyndy.

Beınejazbadan bul tóbeleske birneshe er adamnyń qatysqanyn baıqaýǵa bolady. Onda janjalǵa qatysýshylardyń biri — memlekettik sáýlet-qurylys baqylaý basqarmasynyń basshysy delingen azamat qarsylasynyń jaǵyn syndyrǵan.

Túrkistan oblysynyń ákimdigi bul oqıǵa boıynsha ishki tekserý taǵaıyndalǵanyn, alaıda beınejazbada er adamnyń jeke basyn jáne onyń memlekettik qyzmetke qatysy bar ekenin resmı rastaý áli joq ekenin málimdedi.

Anyqtalǵany, bul kıkiljiń Túrkistanda emes, Shymkentte bolǵan. Oqıǵaǵa qatysqandardyń shaǵymy joqtyǵyna qaramastan, polıtseıler beınejazbany tekserip, ákimshilik is qozǵady.

— Janjaldyń buryn tanys azamattar arasynda bolǵandyǵy anyqtaldy. Oqıǵaǵa qatysýshylar bir-birine shaǵym bildirgen joq. Atalǵan fakti boıynsha qoǵamdyq tártipti buzǵany úshin ákimshilik is qozǵaldy. Materıaldar sotqa jiberildi. Polıtsııa azamattardy qoǵamdyq oryndarda minez-qulyq mádenıetin saqtaýǵa jáne quqyqtyq alań sheńberinde daýly jaǵdaılardy sheshýge shaqyrady, — dep habarlady Shymkent qalasy Polıtsııa departamenti.

Іsti qaraý týraly aqparatty ákimshilik quqyq buzýshylyq jónindegi mamandandyrylǵan aýdanaralyq sotta rastady. Sot QR ÁQBtK 434-babynyń 1-bóligi («usaq buzaqylyq») boıynsha azamat M.-ǵa qatysty materıaldardy zerdeledi.

— 22 qarasha kúni M. keshke Jandosov kóshesinde ornalasqan «Áýlet» kafesiniń janynda, ıaǵnı qoǵamdyq orynda janjal kezinde balaǵat sózder aıtyp, qoǵamdyq tártip pen azamattardyń tynyshtyǵyn buzdy, — dep atap ótti sotta.

Otyrysta ol kinásin moıyndap, qatań jaza taǵaıyndamaýdy ótindi.

— Sot belgilengen mán-jaılarǵa súıene otyryp, kináni moıyndaý, ókiný túrindegi jeńildetetin jaıttardy jáne M.-nyń osyǵan uqsas bap boıynsha buryn ákimshilik jaýapkershilikke tartylmaǵanyn, sondaı-aq aýyrlatatyn mán-jaılardyń joqtyǵyn nazarǵa aldy, — dep qosty sotta.

Nátıjesinde oǵan 78 640 teńge kóleminde aıyppul salyndy. Sot sheshimi áli zańdy kúshine engen joq.

Buǵan deıin Astanada mas kúıinde kólik júrgizgen sýdıanyń isi Bas prokýratýraǵa joldanǵanyn jazǵan edik.