Túrkistanda balýandar 85 keli qoshqardy kóterip, 200 keli júgi bar arbany súıredi
TÚRKІSTAN. KAZINFORM- Balýan jigitter 85 kelilik qoshqar kóterip, 200 kelilik júgi bar arbany súıreýden synǵa tústi.
Ulystyń uly kúnine arnalǵan «Armysyń, áz Naýryz!» atty saltanatty is-shara «Kerýen-saraı» týrıstik kesheniniń aýmaǵynda ótti. Sáni men saltanaty jarasqan kıiz úılerde salt-dástúrdi dáripteıtin kóptegen is-sharalar uıymdastyryldy. Ulttyq sporttyq oıyndardan jarys ótti.
Al alyptar saıysyn kópshilik qyzyǵýshylyqpen tamashalady. Balýan jigitter 85 kelilik qoshqar kóterýden saıysqa tústi. Sondaı-aq, 100 kelilik tasty kóterip, alańdy aınaldy. 130 kelilik bóreni kóterýden ózara synǵa tústi. Sonymen qatar ústinde 200 kelilik júgi bar arbany súıredi. Merekelik is-sharaǵa qatysýshylar arasynda asyq atý, láńgi tebý, naıza laqtyrý sekildi ózgede saıystar ótip, jeńimpazdar arnaıy marapattarǵa ıe boldy.
Merekelik is-sharaǵa oblys ákimi Darhan Satybaldy qatysyp, túrkistandyqtar men qala qonaqtaryn Naýryz meıramymen quttyqtady.
«Túrkistanǵa erekshe mártebe berý baǵytynda belsendi jumys júrip jatyr. Zań jobasy ázirlendi. Qoja Ahmet ıAsaýı babamyz ben uly handarymyz ómir súrgen Túrkistandy álemdik deńgeıdegi týrıstik jáne rýhanı ortalyqqa aınaldyrýdy basty baǵytqa aldyq. Óńirde mańyzdy jobalar júzege asyp, týrıstik, áleýmettik, ekonomıkalyq salalardaǵy áleýeti kóterilip keledi. Onyń ishinde árbir oblys turǵynynyń orny erek. Ár shańyraq – shattyqqa, elimiz berekege tolsyn!» – dedi Darhan Satybaldy.
Naýryz meıramy aıasynda halqymyzdyń mádenıeti men salt-dástúrin, elimizdegi júzege asyrylyp jatqan jańa reformalardy ilgeriletý aıasynda Túrkistanǵa sheteldik buqaralyq aqparat quraldarynyń ókilderi keldi. Merekelik is-sharany tamashalaǵan soń, oblys basshysy arnaıy kelgen qonaqtarmen kezdesip, suhbattasty. Sheteldik qonaqtar Naýryz meıramynyń ótý barysyn qyzyqtap, qazaq mádenıetimen, túrki álemimen tanysty. Ulttyq qolóner jáne taǵamdar kórmesin, ulttyq sport túrlerinen saıysty tamashalady. Áýeleı shyrqalǵan án men kúmbirlegen kúı de, myń buralǵan bıshilerdiń óneri de kelýshilerdi tamsandyrdy. Al teatrlandyrylǵan mýzykalyq horeografııalyq qoıylym kóptiń joǵary baǵasyna ıe boldy.
