Túrkistanda áıelin psıhıatrııalyq ortalyqqa májbúrlep jatqyzǵan er adam sottaldy
TÚRKІSTAN. KAZINFORM – Túrkistanda áıelin kúshtep psıhıatrııalyq ortalyqqa ornalastyrý isi boıynsha sot úkim shyǵardy. Іsti uıymdastyrýshy men onyń sybaılastaryna uzaq merzimge bas bostandyǵynan aıyrý jazasy taǵaıyndaldy.
Túrkistan qalasynyń aýdanaralyq soty otbasylyq janjaldan keıin áıelin Shymkenttegi psıhıatrııalyq ortalyqqa májbúrlep jatqyzyp tastaǵan jubaıy men onyń eki tanysyna qatysty úkim shyǵardy.
Sot málimetinshe, jábirlenýshiniń jubaıyna adamdar tobynyń aldyn ala sóz baılasýymen adam urlaý, psıhıatrııalyq statsıonarǵa zańsyz ornalastyrý jáne oq-dárilerdi zańsyz saqtaý boıynsha aıyp taǵylǵan. Al onyń eki sybaılasy adamdar tobynyń aldyn ala sóz baılasýymen adam urlaý jáne psıhıatrııalyq statsıonarǵa zańsyz ornalastyrýǵa járdemdesý árketi boıynsha kináli dep tanyldy.
Oqıǵa otbasylyq janjaldan bastalyp, adam urlaý faktisi boıynsha qylmystyq iske ulasqan.
– Sotta anyqtalǵandaı, D. Túrkistan qalasyndaǵy bazarlardyń biriniń aýmaǵynan taýyp alǵan áskerı atys qarýyna arnalǵan 16 oq-dárini turǵylyqty mekenjaıynda zańsyz saqtaǵan. Sonymen qatar, birge turatyn jubaıy I.-men týyndaǵan otbasylyq janjaldar saldarynan sottalýshy D. ony psıhıatrııalyq statsıonarǵa zańsyz ornalastyrý jóninde qylmystyq nıet paıda bolǵan. Josparyn júzege asyrý úshin ol tanystary ıÝ. jáne M.-men aldyn ala sóz baılasqan. Sottalýshylar jábirlenýshiniń qol-aıaǵyn skotchpen baılap, kúshtep Shymkent qalasyndaǵy oblystyq psıhıkalyq densaýlyq ortalyǵyna jetkizip, sol jerde sottalýshy D. tıisti medıtsınalyq qujattarǵa qol qoıý arqyly jábirlenýshini mekemege zańsyz ornalastyrǵan, -delingen oblystyq sottyń habarlamasynda.
Sot protsesinde sottalýshylardyń kinási jábirlenýshiniń aıǵaqtary, sot saraptamalarynyń qorytyndylary, kýálardyń jaýaptary, aýdıo‑beınematerıaldar jáne qylmystyq is materıaldarymen tolyq dáleldendi.
Sot úkimimen isti uıymdastyrýshy – jábirlenýshiniń jubaıyna túpkilikti 9 jyl merzimge bas bostandyǵynan aıyrý túrindegi jaza taǵaıyndaldy. Al onyń eki sybaılasynyń árqaısysy 8 jyl merzimge sottaldy.
Sondaı-aq moraldyq zııandy óteý esebinde jábirlenýshiniń paıdasyna sottalǵan jubaıynan 5 mln teńge, al eki sybaılasynyń árqaısysynan 3 mln teńgeden óndirildi.
Úkim zańdy kúshine engen joq.
Budan buryn Atyraýda áıelin oqtaýmen basynan birneshe ret uryp óltirgen 41 jastaǵy adam 10 jylǵa bas bostandyǵynan aıyrylǵanyn jazǵan edik.