Túrkistanda áıelin pyshaqtap óltirdi degen kúdikpen er adam qamaýǵa alyndy
TÚRKІSTAN. KAZINFORM — Túrkistanda 54 jastaǵy áıelin pyshaqtap óltirdi degen kúdikpen er adam ustaldy.
Kórshileriniń aıtýynsha, er adam oqıǵadan keıin óz ómirin qııýǵa árekettengen. Olar buǵan deıin bul kópbalaly otbasy tarapynan qandaı da bir keleńsiz jaǵdaı baıqamaǵanyn aıtady.
Oqıǵaǵa qatysty Túrkistan oblysy polıtsııa departamenti túsinik berdi.
— Kúdikti ustalyp, qamaýǵa alyndy. Atalǵan derek boıynsha sotqa deıingi tergep-tekserý júrgizilip jatyr, — dedi oblystyq polıtsııa departamenti Tergeý basqarmasynyń bastyǵy Muhtar Seıdildaev.
Qazirgi ýaqytta oqıǵanyń barlyq mán-jaıyn anyqtaýǵa baǵyttalǵan qajetti is-sharalar atqarylyp jatyr. Tergeý nátıjesi boıynsha qoldanystaǵy zańnama aıasynda tıisti sheshim qabyldanady.
Polıtsııa tergeý múddesindegi ózge aqparat QR QPK-niń 201-babyna sáıkes jarııa etýge jatpaıtynyn málimdedi.
Buǵan deıin Atyraý turǵyny úsh jasar qyzynyń kózinshe áıelin pyshaqtap óltirgenin jazǵan edik.
