Túrkistanda asyl tuqymdy eshkiler kórmesi ótti
TÚRKІSTAN. KAZINFORM - Respýblıkalyq is-sharaǵa 200-ge jýyq mal basy men 350-den astam adam qatysty.
Túrkistan qalasynda alǵash ret «Sút jáne et baǵytyndaǵy asyl tuqymdy eshkiler» respýblıkalyq kórmesi ótti. Іs-shara Túrkistan oblysy ákimdiginiń qoldaýymen, «Seksek ata» sharýashylyǵynyń bastamasymen uıymdastyryldy.
Kórmege Qazaqstannyń ár óńirinen kelgen fermerler, veterınarııa salasynyń mamandary men qonaqtar qatysty. Shetelden ákelingen Zaanen, Alpi, Lamancha, Anglo-nýbıı, Býr, Kamorı, Gýlabı syndy tanymal tuqymdar qoıylyp, jalpy sany 200-ge jýyq asyl tuqymdy mal basy tanystyryldy. Olardyń qatarynda sútti eshkiler, tekeler jáne laqtar bar.
Kórme barysynda qatysýshylar eshki sútinen jasalǵan qurt, irimshik, aıran, kóje, ıogýrt ónimderinen dám tatty.
Kórmege kórshiles Reseı, Qyrǵyzstan, Ózbekstan azamattary qyzyǵýshylyq bildirip, tikeleı efır arqyly tamashalady.
Tirkeýden soń eshkilerden synamalar alyndy. Atap aıtqanda, syrt pishinderi baǵalanyp, ekstereri qaraldy. Boıy men salmaǵy ólshendi. Sútiniń maılylyǵy men qunarlylyǵy zerdelendi. Etti baǵyty da eskerildi. Qazylar alqasy jeke-jeke upaı qoıyp, ádil túrde eń erekshe eshki túrin anyqtaýǵa atsalysty.
Nátıjesinde eń sútti eshki Túrkistan óńirinen, syrt kelbeti úzdik tuqym Shymkent qalasynan, eń aýyr eshki Jambyl oblysynan shyqty.
Sonymen qatar «Saýynshylar», «Asyldandyrý», «Eń úzdik sút ónimderi» syndy nomınatsııalar boıynsha kýboktar men 300 myń teńgege deıingi syılyqtar tabystaldy. Laqtar saıysy men saýynshylar jarysy da kópshiliktiń qyzyǵýshylyǵyn oıatty.
Kórmeni tamashalaýǵa kelgenderdiń sany 350 adamnan asty. Uıymdastyrýshylar bul ıgi bastama keleshekte dástúrli túrde jalǵasatynyn jetkizdi.
Aıta keteıik, budan buryn Túrkistan oblysynda 47 kóshege ardagerlerdiń esimi beriletinin jazǵan bolatynbyz.