Túrkistanda «arzan jer satylady» degen jalǵan habarlamalar tarady

TÚRKІSTAN. KAZINFORM – Túrkistan qalasynda arzan baǵada jer telimderi satylyp jatyr degen mazmundaǵy jalǵan habarlandyrýlar áleýmettik jeliler men túrli messendjerler arqyly taralyp jatyr.

Qazirgi tańda Túrkistan qalasynda 95 350 azamat jer telimin alý úshin kezekte tur. Kezekke tirkelý 2000 jyldan beri jalǵasyp keledi.

Qalalyq jer qatynastary bóliminiń basshysy Baýyrjan Dosjanovtyń aıtýynsha, sońǵy ýaqytta birneshe azamat jalǵan jer telimderine qatysty qujattardy usynyp, olardyń zańdylyǵyn tekserýdi suraǵan. Tekserý barysynda atalǵan qujattardyń basym bóligi jalǵan ekeni anyqtalǵan.

– Qoldanystaǵy zańnamaǵa sáıkes, jer telimin satyp alý-satý mámilesi tek belgilengen tártippen rásimdelip, shekarasy naqty aıqyndalǵan jáne quqyq belgileıtin qujattary tolyq bolǵan jaǵdaıda ǵana júzege asyrylady, - dedi ol.

Qala ákimdiginiń málimetinshe, quqyqtyq mártebesi aıqyndalmaǵan, shekarasy belgilenbegen jáne memlekettik tirkeýden ótpegen jer ýchaskelerin paıdalanýǵa zań júzinde jol berilmeıdi.

– Osyǵan oraı, qala turǵyndary men jer telimin satyp alýǵa nıetti azamattarǵa mámile jasamas buryn jer ýchaskesiniń zańdylyǵyn mindetti túrde qalalyq jer qatynastary bóliminen nemese tıisti memlekettik organdardan naqtylap alýdy usynamyz. Kúmándi usynystar men deldaldardyń ýádesine senbeý, alaıaqtyq áreketterden saqtaný mańyzdy, - delingen qala ákimdigi taratqan aqparatta.

Qala ákimi Ázimbek Pazylbekulynyń aıtýynsha, 2005 jyldan beri Túrkistan qalasynda kezekte turǵan azamattarǵa jer telimderi berilmegen.

– Atalǵan máseleni sheshý maqsatynda eki arnaıy joba daıyndalǵan. Byltyrdan bastap bul jobalardy qarjylandyrý bastaldy. Ol jobalar júzege assa, Baıanaýyl baǵytynda, Qyzylorda tas jolynyń oń jaǵyndaǵy aýmaqta kezekte turǵan azamattarǵa jer telimderi beriledi, - dedi qala ákimi.

Búginde atalǵan aýmaqta gaz júıeleri tolyq tartylǵan. Endi elektr jelilerin júrgizý jáne sý júıesin tartý jumystary qaldy.

– Qazir qarjylyq múmkindik azdaý bolyp tur. Biraq bul jumys toqtamaıdy. Qarjy tolyq qarastyrylyp, tıisti sheshim qabyldanǵan jaǵdaıda, kezekte turǵan 1600-den astam azamatqa jer telimi tabystalady, - dedi qala ákimi.

Budan buryn Túrkistanda 26 jer ýchaskesi 83 mln teńgege negizsiz satyp alynǵanyn jazǵan edik.