Túrkistanda arheologııa eskertkishteri rezervatyn qurý jáne ustaý tártibi bekitildi
ASTANA. KAZINFORM — Túrkistan qalasynda arheologııa eskertkishterin saqtaý jáne olardyń túpnusqalyq kelbetin qorǵaý maqsatynda rezervat qurý men ony ustaýdyń jańa qaǵıdalary ázirlendi.
Qujat «Túrkistan qalasynyń erekshe mártebesi týraly» Zańǵa sáıkes qabyldanyp, tarıhı-mádenı mura nysandaryn qorǵaýdyń biryńǵaı tártibin aıqyndaıdy.
Atap aıtqanda, jańa qaǵıdalarda arheologııa eskertkishteri — kóne qonystar, qalashyqtar, qurylystardyń qaldyqtary, qorymdar, obalar, petroglıfter, tas músinder jáne adamzattyń kóne mádenıetine qatysty ózge de nysandar dep kórsetilgen. Sondaı-aq eskertkishterdi paıdalanýshynyń quqyqtyq mártebesi men jeke arheologııalyq nysandardyń anyqtamasy naqtylanǵan.
Sonymen qatar qujatqa sáıkes, arheologııa eskertkishteri rezervaty — Túrkistan qalasynyń tarıhı-mádenı murasynyń eń osal bóligin saqtaýǵa baǵyttalǵan arnaıy qorǵalatyn aýmaq retinde aıqyndaldy. Rezervatty qurý týraly sheshimdi jergilikti atqarýshy organ qabyldaıdy.
— Rezervatqa engizilýi úshin eskertkish respýblıkalyq mańyzy bar tarıh jáne mádenıet eskertkishteriniń memlekettik tiziminde bolýy tıis. Al eskertkish tolyq joıylǵan jaǵdaıda, ony rezervat quramynan shyǵarý sol organnyń sheshimimen júzege asyrylady, — delingen qujatta.
Qaǵıdada rezervat aýmaǵynda júrgiziletin jumystarǵa qoıylatyn talaptar da naqty belgilengen.
— Eskertkishterdiń materıaldaryna, tarıhı kelbetine nemese tabıǵı landshaftqa zııan keltiretin kez kelgen áreketterge tyıym salynady. Paıdalanýshy rezervattyń jaı-kúıin turaqty baqylap, profılaktıkalyq kútim júrgizýge mindetti, — dep aıqyndalǵan qujatta.
Oǵan qosa, Túrkistan qalasynyń jergilikti atqarýshy organy tarıhı-mádenı mura obektilerin anyqtaý, esepke alý, saqtaý, zertteý jáne monıtorıng júrgizý jumystaryn qamtamasyz etetin bolady. Al arheologııalyq jáne ǵylymı-restavratsııalyq jumystar tek ýákiletti organnyń kelisimimen atqarylady.
Qujattyń qabyldanýy Túrkistan qalasynyń baı tarıhı murasyn qorǵaý jáne ony keleshek urpaqqa jetkizýge baǵyttalǵan mańyzdy qadamdardyń biri retinde baǵalanyp otyr.
Aıta keteıik, Túrkistan oblysyndaǵy arheologııalyq eskertkishter maqta alqabynyń astynda búlinip jatyr.
Buǵan deıin Álkeı Marǵulan atyndaǵy Arheologııa ınstıtýtynyń bazasynda Ulttyq arheologııalyq qyzmet qurylatynyn jazǵanbyz.